NA den male ick van sommighe aenghesproken ende vermaent gheweest zy, dat ick een Liedekens boecxken, voor de ionckheyt ende oock voor ander die welcke meer verstants in liedekens ghemaeckt wt der Schrift dan in de Psalmen hebben (want die somwijlen duyster zijn) soude willen wt andere exemplaren oude ende nieuwe te samen vergaderen, ende in druck wtgeuen. So heb ick dese hare begheerte niet afgheslaghen maer ben haer te wille willen wesen, ende heb so wt oude ende nieuwe de beste ende die my meest stichtende dochten, te samen by een gebracht (waer van sommighe zijn die met partijen gesongen moghen werden) tot stichtinghe ende opbouwinghe der ghemeynte Christi. Ende bidde derhaluen alle Christlicke Sangers, sy willen desen mynen slechten arbeyt voor goet aennemen, ende oft ick mocht eenighe ander goede liedekens hier in vergheten hebben, dat sy my dat ten besten afnemen, want wy willent op een ander tijt verbeteren so ons dat de Heer toe laet. Hier met den Heere beuolen, ende den woorde zijnder ghenaden. Amen.
Auteursrechtvrij