Veelderhande schriftuerlijcke liedekens

203. Een ander.

UErnieut v inden gheest wie dat ghi zijt ⁺
In desen bequamen tijt ⁺
Met Abraham werst verblijt
Wilt v als nv veriubileren
Met Isaac en Iacob trect in het crijt
Uoort Christen ghelooue strijt
Onder Gods banieren v beurijt
Met Christum wilt v veraccorderen
Uolcht Petrus transpoort
Paulus leeringhe nv aenhoort
Met Timotheum maeckt accoort
Inden gheest wilt leuen
Dat soete nieuwe Iaer is ons van Godt gegeuen.

Christus is den wijnstock soet ⁺
Die aenden cruyce stoet ⁺
Hy verloste ons met zijn bloet
Wilt alleen op hem betrouwen ⁺
Hy heeft doorbroocken dat helsche gloet
Ons sondich ghebroet
Daert al om steruen moet
Het si mannen ofte vrouwen
Wilt Christum volghen saen
Soo Stephanus heeft ghedaen ⁺
Den moordenaer heeft rust ontfaen ⁺
Opt recht berou van zijn sondich leuen
Dat soete nieuwe Iaer etc.

Een yeghelijc treck tcleet van ootmoetaen
Met druck met meighen traen
U sondich leuen wilt afgaen
Wilt v al tot Godt bekeeren
Hy is die onse sonden heeft wtghedaen ⁺

+ Eph.iiij.

+ i.Cor.vi.

+ Ioan.xv.

+ Matth.[xxvij].

+ Col.i.

+ Act.vij.

+ Lu.xxiij.

+ i.Pet.ij.

[fol. Aa3r]

 

En liet hem aent cruyce slaen ⁺

 

Met zijn armen wijt ontdaen

 

Sijnen lof wilt altijts vermeeren

 

Tot ootmoedicheyt v keert ⁺

 

So ons Paulus oock leert

 

En des Heeren lof vermeert

 

Elck wil dit aencleuen

 

Dat soete nieuwe Iaer is ons etc.

 

 

 

Hoort toe ghi Cristen creatueren al gemeyn

 

Groot ende daer toe cleijn

 

Compt tot dat leuende water reyn ⁺

 

Om niet sal hijt v gheuen ⁺

 

Christus is de claer suyuer fonteyn

 

Hy spreeckt in shemels pleyn

 

By sinen Uader certeyn

 

Hy is warachtich den wech en leuen ⁺

 

Onser alder Aduocaet ⁺

 

Ghelijck daer ghescreuen staet

 

Ons warachtich aflaet

 

Seer claer beseuen

 

Dat soete nieuwe Iaer is ons etc.

 

 

 

Laet ons tot den stoel der genaden saen ⁺

 

Na Paulus vermaen

 

Om bermherticheyt te ontfaen

 

Stout en onbeureest nv treden

 

Christus ons bisschop is ten hemel ghegaen ⁺

 

Hy weet hoe wy zijn belaen

 

Dus wilt hy ons beraen

 

Met Olie der bermherticheden

 

Heeft hy ons comen dwaen

 

Hy en wilt ons niet versmaen

 

Hy bidt om ons bystaen ⁺

 

Uoor sinen vader verheuen

 

Dat soete nieuwe Iaer ons etc.

 

 

 

Prince met alle Apostelen ient

 

En Propheten excelent

 

Timmert op dat fondament ⁺

+ Matth.xxvij.

+ Eph.iiij.

+ Esai.lv.

+ Ioan.vij.

+ Io.xiiij.

+ i.Ioan.ij.

+ Heb.v.

+ Lu.[xxiiij].

+ Ro.viiij.

+ Ephe.[ij].

[fol. Aa3v]

 

Dat is Christus den hoecksteen ghepresen

 

Soo blijft die timmeringhe vroom ongeschent

 

Paulus wooorden wel inprent

 

En den heylighen gheest bekent

 

Sult ghy tot eenen tempel wesen ⁺

 

Worpt den ouden Adam van ⁺

 

En doet den deeuwen an

 

Uolcht Christus wijf en man

 

Soo en dorst ghy niet beuen

 

Dat soete nieuwe Iaer is ons van God gegeuen.

+ i.Cor.iij.

+ Col.iij.