Veelderhande schriftuerlijcke liedekens

[fol. Aa1r]

201. Na de wijse Rijck Godt wie sal ick claghen.

VErblijt v ghy creatueren
Baret vruecht ende iolijt
Al siedy Gods woort nv [sl]ueren
Door menighen ypocrijt
Wilt den Heere des oogst vertellen
Dat hy arbeyders fijn ⁺
In sinen oogst wil stellen ⁺
Oft anders salt al verloren zijn.

Wacht v voor die valschen Propheten ⁺
Die daer comen in schaeps ghelaet
Die der weduwen huysen op eten ⁺
Door haren valschen raet
Godt bekeer haer sinnen
En gheeft haer een ander confoort
Dat si haer boosheyt kinnen
En preken dat rechte Gods woort.

Wie soude hem nv verschricken
Die den rechter te vriende heeft
Hy mach wel bly verquicken
Die in Gods woorden leeft
Wie mach hem voor Christum versaghen
O menschen heel verdwaelt
Onse qualen heeft hy ghedraghen⁺
Ende pijn en schult betaelt.

Uan blinde leyders der blinden
Suldy looffelijck zijn betraept
En van uwen naesten vrienden
Die in uwen arme slaept⁺
Tot brande oft verdrincken
Suldy zijn gheaccuseert
Maer een let en machmen v niet crencken
Uoor dat haer Godt confirmeert.

Salich moeten si wesen⁺
Die om die waerheyt zijn ghepijnt⁺

+ Mat.ix.

+ Luc.x.

+ Mat.vij.

+ Matth.xx.xxiij.

+ Esa.liij.

+ [Mir].vij.

+ Mat.v.

+ i.Pet.iij.

[fol. Aa1v]

 

Ueracht, bespot, begresen

 

Alsoo nv claerlijck schijnt

 

Maer troost v in Christus lijden

 

En wilter v niet in verslaen

 

Die knecht en mach tot gheenen tijden ⁺

 

Bouen sinen meester gaen. ⁺

 

 

 

En wilt v niet veruaren

 

Als ghy voor den rechter coempt

 

Al mach hy v beswaren

 

Dat ghy totter doot werd verdoempt

 

Sterckt v in Christum al ghemeene

 

Om onser menscheyt cranck

 

Want sonder hem zyn wy alleene

 

Als coper sonder gheclanck.

 

 

 

Wilt Godt hem voor my setten ⁺

 

Wat moghen my die menschen doen

 

Gheen man en mach my letten

 

Al waer hy noch soo coen

 

Sterckt v in Christus lichte

 

Sulcke helpe als ghy behoeft

 

Want die dit Liedeken dichte

 

Die heeftet wel gheproeft.

+ Mat.x.

+ Luc.vi.

+ Ro.viij..