Veelderhande schriftuerlijcke liedekens

[fol. Y4v]

187. Na die wijse. Veriubeleert v ghy Uenus ionghen.

O Crancheyt des vlees nv wilt v trueren laten
En wilt v ooghen inden hemel slaen
U menschelijcke crancheyt regeert nv al by maten
Want ghy moet door Christum totten Uader gaen.

O Christelijcke broeders nv houdt Gods woort in weerden
Die crancheyt des vleeschs gheuoelende zijt
Om onsen wille soo daelde die Heere ter eerden
En is voor ons ghegaen in eenen bitteren strijt.

Uan een suyuer maechdeken so wilde hi zijn geboren
Die Heere die niemant en can verstaen
O cranheyt des vlees ghi had ooc moeten smoren
En die eewighe doot haddy moeten ontfaen.

Mocht onse cranheyt yet hebben verworuen
En dat duer ons quaem eenighe salicheyt
Soo waer de Heer te vergheefs ghestoruen
Inder eewicheyt heeft hyt ons al bereyt.

Godt kent zijn schapen en si hooren zijn stemme
Niemant en machse trecken wt zijnder hant
Sijn woort alleen hoort, want God ghetuycht van hem
En heeft ons verlost van des duyuels bant.

O cranckheyt des vleeschs en weset niet soo bloode
Al gheuoeldy in v der hellen pijn
Wat dinghe waer Christus die Heere van noode
Als ghy seluer meyndet perfeckt te zijn.

Door eenen mensche waren wi al verwesen
En moesten die eewighe doot ontfaen
Duer eenen mensche zijn wy al verresen
En sullen duer hem in glorien gaen.

Die in Christus salich willen leuen

[fol. Y5r]

 

Moeten veruolghinge lijden zijt dies wel vroet

 

Al beghint ons vleesch daer voor te beuen

 

Door lijden compt ons zijn eewicheyt goet.

 

 

 

Wie soude ons moeghen trecken

 

Uan die liefde die hy tot ons inder eewicheyt draecht

 

Hy gheneest al onse sondighe vlecken

 

Wantet zijn goetheyt alsoo behaecht.

 

 

 

O edel mensche wilt toch hier op achten

 

En wilt Christum altijt volghen naer

 

By Godt den Uader sal hy v verwachten

 

Onslaet v van alle sorghen ende ander vaer.

 

 

 

Die Princelijc Prinche houdt in v memorie

 

Want sonder hem en vermuechdy niet

 

Duer zijn gracie comen wy in zijn glorie

 

Want alle vleesch is cranck alsoomen wel siet.