Veelderhande schriftuerlijcke liedekens
(ca. 1552-1554)–Anoniem Veelderhande schriftuerlijcke liedekens–
Auteursrechtvrij
[Folio X3r]
| |
En wilt dat ghebeden van ons haen,
Gheeft dat niet bidt alleen mijnen mont
Helpt dattet comt van herten gront.
Gheheylighet worde den name dijn
Dijn woort by ons helpt houden reyn
Op dat wy moghen leuen heylichlijck
Na dijnen name weerdelijck
Behuet ons Heer voor valsche leere
Dat arm verdoelt volck hem bekeere.
Het come dijn rijcke tot deser tijt
En duert hier nae in eewicheyt
Die heylighe gheest die woon ons by
Met sine ghauen menigherley
Des duuels toren en groot ghewelt
Heer breect voor hem dijn kerc onthelt.
Dijnen wil ghesciede Heer God also gelijc
Op der aerden als in hemelrijc
Gheeft ons verduldicheyt in lijdens tijt
Ghehoorsaem te zijn in lief en leyt
Weert ende keert alle vleesch en bloet
Dat teghen dijnen godlijken wille doet.
Gheeft ons huden ons daghelicx broot
En wat my behoeft tot lyues noot
Behuet ons Heer voor onurede ende strijt
Uoor siecten ende voor dieren tijt
Dat wy in goede vreden staen
Dat sorge ende ghiericheyt van ons gaen.
Alle onse schulden vergheeft ons Heer
Dat si ons niet en bedroeuen meer
Als wy ooc onse schuldenaren
Haer schult en feel vergheuen gheern
Te dienen maect ons al bereyt
In gherechtigher liefden in eenicheyt.
En vuert ons Heer in versoekinghe niet
Als ons die boose gheest aensiet
Ter rechter oft ter slincker hant
Helpt ons den stercken wederstant
| |
[Folio X3v]
| |
Int ghelooue vastende wel gherust
Ende duer des heylighen gheester troost.
Uan allen oeuel ons verlost
Tzijn die tijt ende daghen boos
Uerlost ons van die eewighe doot
Ende helpt ons inder lester noot
Bereyt ons Heer een salich eyndt
Neempt onse siele in dynen handen.
Amen dat is het worde waer
Sterct onse ghelooue ommers daer
Op dat wy oock niet en twijfelen daer aen
Dat wy hier mede ghebeden haen
Wt dijn woort inden name dijn
Soo sprecken wy dat amen fijn.
|
|