Veelderhande schriftuerlijcke liedekens


118. Een ander. ICk ben die Heere alleijn v Godt Wilt v tot mi begheuen En wilt siet doen naer mijn ghebot Soo suldy eewich leuen Doet soot beraempt//al wordy ghepraemt Met lijden swaer U niet en schaempt Ghy wort ghenaempt//mijn kinderen claer. Ghy moet hier lijden om mijn woort gent Ick hebt v aldus ontploken Siet dat ghy dit in v herte prent Een haer en mach v niet croken Al sonder my//dus troost v ghy Hebt goeden moet Met herten bly Uerhuecht v vry//in mijn woort soet. In druck sult ghy my roepen aen U smerte sal ick draghen Om v te verlichten hoort mijn vermaen Tot my soo compt v claghen Dus zijt bereet//tot allen leet Ghy wort bequaem U bloet en sweet Dat geeft gereet//om minen naem. Dus laet de weerelt met v begaen
[Folio O7r]
Om v bloet te vergieten Wilt dat ghetal der heylighen saen Ueruullen sonder verdrieten Onder sweert en vier//soo gheeft v hier Met liefde groot Wt minnen fier Maeckt gheen getier//ick ben v hoot. Al ist dat ghy hier wort benijt En versmaet aen alle sijen Denckt dat ghy mijn discipel zijt En veruult in v mijn lijen Twas v betrout//met monden stout Acht gheen miskief Wordy verdout En seer benout//v naeckt gherief. Nv compt die ghelooft in my alleijn En hebt om my gheleden Ghy waert in uwen druck seer reijn Als doen ghy wert bestreden Met valsche leer//tot elcken keer Duer tsduyuels raet Maer ick v Heer Bewaer v seer//vroech en laet.