Veelderhande schriftuerlijcke liedekens

115. Na die wijse. Soot tbeghint.

ICk wil my gaen verhueghen
Uerblyden in minen moet
Ick weet ten is gheen lueghen
Na tsuer soo comptet soet
Den kelck als roet
Die moet eerst zijn ghedroncken
Gods soon was goet
Hy is hem eerst gheschoncken.

Christus heeft wiltet vaten
Al inden vleesch gheleen ⁺
Ons een exempel ghelaten
Sijn voetstappen na te treen
Wapent v ghemeen
Met dien sin al tsamen
Het moet zijn ghestreen
Wie Christus niet en wil schamen.

Wie hem schaempt seyt hy claerlijck ⁺
Uoor dit ouerspelighe gheslacht ⁺
Die sal hy schamen waerlijck
Uoor sinen vader dit niet veracht

+ i.Pet.ij.

+ Mat.viij.

+ Luc.ix.

[fol. O4r]

 

Weest wijsselijck bedacht

 

En ghedenct die eewighe smerten

 

Daer staet wee, hier op acht ⁺

 

Ouer die daer zijn dubbel van herten.

 

 

 

Hier om soo laet ons leuen

 

Wt den ghelooue alleijn

 

Habacuc heeftet beschreuen ⁺

 

Alsoo sal den rechtueerdighen pleijn

 

Acht dat niet cleijn

 

Dat ghy gheueynst sout wesen

 

Gods gheest die vliet certeyn ⁺

 

Den gheueynsden soo wy lesen.

 

 

 

Nv laet ons in Gods weghen

 

Oprecht gaen alst behoort

 

Tvlees is tot quaet gheneghen

 

Elck acht zijn nieu herboort

 

Gaet int vleesch niet voort

 

Ghy die inden gheest hebt beghonnen

 

Laet v siele niet versmoort

 

Die Christus heeft ghewonnen.

 

 

 

Sijt ghy met Christus verresen ⁺

 

Soo soect dat daer bouen is

 

Daer Christus is ghepresen

 

In die heerlicheyt zijns Uaders fris

 

Die weerelt sal ris

 

Uergaen met haren lusten

 

Den gheloouighen sal wis

 

Ingaen tot zijnder rusten.

 

 

 

Tgheloof sonder de wercken ⁺

 

Dat is doot seyt Iacobus siet

 

Op Paulus reden wilt mercken ⁺

 

Het is sonder die liefde al niet

 

Hier om met vliet

 

Bemint die een die ander

 

Als ons Christus ghebiet ⁺

 

Dat wy lief souden hebben malcander.

 

 

 

Ende alle menschen mede

+ Eccl.ij.

+ Hab.ij.

+ Sap.i.

+ Col.iij.

+ Iac.ij.

+ i.Cor.xiij.

+ Ioan.xiij.

[fol. O4v]

 

Soo ons die schriftuere leert

 

Ist moghelijck hout vrede

 

Met eenen yeghelijck diet begheert

 

Blijft ghefondeert ⁺

 

Als dees weerelt en wilt v niet stellen

 

Hoe si ons persequeert

 

Tis hier een weynich quellen.

 

 

 

Nv vrienden alle gader

 

Laet ons toch trecken een lijn

 

Wy hebben soo lieuen Uader

 

Laet ons dien ghehoorsaem zijn

 

Om druck noch om pijn

 

Hem gheensins te verstoren

 

Uoort laet ons fijn

 

Eendrachtighe liefde oorboren.

+ Ro.xij.