Veelderhande schriftuerlijcke liedekens

[fol. K2r]

77. Na die wijse. Alle vogelkens gebruycken haer natuer.

HOe arch soo is dat herte
In Ieremias siet ⁺
Uol qualen en vol smerte
Ist niet een groot verdriet
Men cans gronderen niet
Uan allen duechden berooft
Maer salich is die gene die inden Heere ghelooft.

Die Heere sach vander hoochden
Oft daer niet was egheen
Die na den goeden vraechden
Maer daer en wasser oock niet een
Sy en waren int gheween
In sonden was haer ghedacht
Maer salich is die gene die op den Heere verwacht.

Sy waren af gheweken
Ghereet om te doen quaet
O natuere vol ghebreken
Siet doch hoet met v staet
Neempt hier op een beraet
In sonden sidy ghecnoept
Maer salich is die gene die inden Heere hoept.

Fenijn was onder haer tonghe
Haer kele een open graf
Haren ganck vol onghesonden
Dits claerder dan den dach
Dits dat natuere vermach
Wat segghen wy hier toe nv
Och salich maect hem Heere die hem verlaet op v.

O Heere alder Heeren
Ontfermt v schepsel cranck
En willet renoueren
Al ist in duechden swanck
In v is alle macht
Soo daer gheschreuen staet

+ Ieremi.

[fol. K2v]

 

Dat hy sal salich wesen die hem op v verlaet.

 

 

 

Maer die dit liedeken dichte

 

Godt gheue haer graen en spoet

 

Te comen totten lichte

 

Gods gheest in haren moet

 

Sy en wenst gheen ander goet

 

Sy denckt soo menichfout

 

Hoe salich is die ghene die inden Heere betrout.