Veelderhande schriftuerlijcke liedekens

71. Na die wijse. Van den Lustelijcken Mey.

GHy Christen geesten weest nv verblijt
En wilt vrolijck ontwaken
Ons is gheboren des seker zijt ⁺
Ons verlosser voor alle saken
Dus wilt hem lof prijs, en eere bien
Hy heeft ons allende aenghesien
Daer wy soo deerlijck in laghen
Onsen druck compt hy veriaghen.

Abrahams beloofte is nv volbracht
Wt Iacob is opgheresen
Een sterre na dat hebben ghewacht
Doude Uaders alsoo wy lesen
Heylich heylich is hy tgoddelijck saet
Emanuel een licht dwelck niet en vergaet ⁺
Dat inde duysternisse is ghecomen
Een licht tot onser vromen.

Adams val heeft hy opgherecht
Dus laet ons sinen lof vermonden
Onse sonden aen thoute des cruycen ghehecht
Ons ghenesende door sine wonden
Hy is dbeghin, dmiddel en deynde me
Alpha et o sinen eewighen vre
Wilt hi ons minnelijck schincken
Laet ons hem te louene ghedincken.

Laet ons loouen den Heere groot
Die hem seluen heeft willen verneren
Te steruene voor ons den doot
Om dat hy onsen pays sou confirmeren
Dwelck hem oprechte liefde riet

+ Luce.ij.

+ Mat.i.

[fol. I6r]

 

Dus singt den Heere een loffelijck liet

 

Al dat leuen heeft vercreghen

 

Looft den Heere in alle weghen.

 

 

 

Den oppersten Prince seer excellent

 

Looft met Psalmen en ghebeden

 

Sijn goddelijck woort zijt obedient

 

Soo coemdy inde hemelsche steden

 

Daer vruechde is sonder eynde claer

 

Die voor elcken bereet is voorwaer

 

Die ter weerelt zijn woort beleuen

 

Sal hy zijn rijcke gheuen.