Veelderhande schriftuerlijcke liedekens

54. Een ander.

GOds edel kinder die hier soect te behagen
In al v leuen uwen vader goet
Hoort zijn geboden die hi wil sonder clagen
Uan v ghedaen hebben wt liefden soet
Sonder taenmercken verdriet oft voorspoet
Door dese brengt hy v tot v selfs mishaghen
En tot zijn ghenaden lopen doet.

Teerste is v Heere uwen God is een alleene
Gheen ander goden en sullen voor hem staen
Hem suldy aenbeden dienen ende anders gheene ⁺
En alle goet van zijnder hant ontfaen
Want alle hulpe en troost moet wt hem ghaen
In al ons twifelen moeten wy al ghemeene
Tot hem om raet lopen en ander versmaen.

Tweede is Gods name sult ghy met groter eeren
In uwen mont nemen al sonder spot
In gheenen sake ydelijck sult ghy v daer toe keeren
Noch om verganclijck goet sweren by Godt
Al dat ghy doet sal zijn na Gods ghebot
Om sinen edelen name alleene te vermeeren
Niemant elck prijs gheuen voor een lof.

Terde is wilt dencken dat ghi sult heylich maken
Den Sabbaot of den dach des rusten soet
Uan v selfs wercken rustende in al v saken
Gods edel wercken doende metter spoet
Met vasten betrouwen op twerck dat God doet
Siende om v selfs verloegenen te gheraken

+ Exodi.

[fol. G5r]

 

Iesum met v cruyce volghende in ootmoet.

 

 

 

Tvierde is eert vader ende moeder eersame

 

En weest die hulpsamich daer ghy moecht

 

Al zijn si stranghe tot v en onbequame

 

Weest haer nochtans gehoorsaem in dye duecht

 

Om Gods wille al verdraghet met vruecht

 

Want dit begheert Godt van v tot uwer vrame

 

Daer voor beloeft hy v des leuens iuecht.

 

 

 

Tvijfste is met wercken noch met den wille ooc

 

Wt nijt of gramschap en staet niemant doot mede

 

Hebt met uwen naesten altijt pays en vrede

 

Helpt vrient ende viant heeft hy schade of noot

 

Want Ihesus selue is die v soo gheboot

 

Aent cruyce ghestoruen om onse salicheden

 

Die zijn vianden waren door sonden groot.

 

 

 

Tseste is v naesten goet en suldi niet stelen

 

Noch met bedroch ontrecken wter hant

 

Tsi in vercopen oft coopen ofte spelen

 

Oft int onthouden eenich loon of pant

 

Noch af winnen met listen huys of lant

 

Mer hem te helpen en laet v niet veruelen

 

Sonder taensien of ist vrient oft vyant.

 

 

 

Tseuenste is gheen ouerspel en suldi hantieren

 

Noch in oncuysheyt leuen metter daet

 

Met al v leuen als een Gods kint regieren

 

Reyn ende cuysch beleiden uwen staet

 

In woorden in wercken volghende Gods raet

 

Sonder yet teghen Gods woorden te versieren

 

Want daer wt compt die menschen alle quaet.

 

 

 

Tachste is en wilt gheen vals getuyge geuen

 

Twelck uwen naesten brenct in swaer verdriet

 

Mer zijt warachtich oprecht in al v leuen

 

Gheen leughen spreken wat v gheschiet

 

Maer na v herte gheeft des woorts bediet

 

Soo suldy God uwen Uader sonder sneuen

 

Als een goet kint na volghen diet v hiet.

 

 

 

Tnegenste is v herte en sal ooc niet begeeren

[fol. G5v]

 

Om te misbruycken een ander mans wijf

 

Mer om haer eert suldy lieuer verteeren

 

Mostet so ghebueren v goet en lijf

 

Want Christus selue seyt dit woort seer stijf

 

Toncuys aensiender vrouwen brenct sulc deeren

 

Dat voor Godt ouerspel maect sulcken bedrijf

 

 

 

Tienste is na gheen goet en suldi ooc verlangen

 

Dwelck uwen euen mensche toebehoort

 

Noch metter herten begerich yt beuanghen

 

Daer uwen naesten om soude zijn verstoort

 

Want dit is natuere en oock Gods [evel] woort

 

Dat elck een ander sal doen sonder verstranghen

 

Dwelck hy wil dat hem sal ghedaen zijn voort.

 

 

 

Daer om o menschen bidt Godt om zijn genade

 

Want van v seluen hebdy cleyne macht

 

Om te volbrenghen al die na Gods gheest rade

 

Godt moet v helpen door zijns selfe cracht

 

Door v ghelooue in God dwelck hem verwacht

 

Al dit ghebueren is dat ghy vroech en spade

 

In hem betrout en zijn woort niet en veracht.