Veelderhande geneuchlijcke dichten, tafelspelen ende refereynen

[p. 97]

Hoe Aernouts Broeder sal doen, als de Dorpvrou klaeght dat haer Boter ontoovert is. aant.

Comt ghy op Dorpen in eenigh huys
Wilt v niet verwerpen noch wesen confuys
Ende soo ghy die vrouwe dan vindt alleen
Segt dan: O vrouwe ghy zijt soo reen
Gheeft my vanden uwen, t' mijne is oppe
Ic hebbe seer luttel in mijnen kroppe
Gheeft wat, dat v God moet loonen
Hy is goedertieren hy en sal v niet hoonen,
Hout wat, en geeft wat t' zy vleesch of broot
Oft gheeft boter kleyn of groot,
Doetse dan teghen u eenigh gheklacgh
Ende seyt: mijn boter is my ontoovert, o wach,
Ic en kan ghekrijgen eenighe boter niet
Segt dan: Vrouwe en weest daer om te sotter niet,
Ick weet die conste ende oock den raet
Dat ghy boter sult crijghen t' uwer baet,
Maer wat wilt ghy my gheuen seght my dat
Want voor mijn arbeyt moet ick hebben wat,
Vraeght sy: wat wilt ghy hebben dan?
Soo segt: een Hespe, geldt, ende vleesch daer van,
Heeftse gheen ghelt, soo neemt dat ghy krijghen meugt
Want sy sal van v hebben weynigh deught,

[p. 98]

 

aant.

 

Dan sult ghy v woorden te spreken beghinnen

 

Toe zeghenen, en kruycen voeght v sinnen,

 

Ende seght: Benedicite Dominus

 

Nae mijn vijsten moet comen gruys,

 

Ende valt dan neder op v knien beyde

 

Kruypt op dat vier met ghoeden bescheyde,

 

Segt: In nomine Pannekoeck, Filium & tantum,

 

Comt weder Butitum nil oft aliquantum,

 

Ende kruypt soo driemael om dat vier

 

Oock teghen elcken hoeck vanden huyse schier,

 

Maeckt een kruys, ende vijst daer mede

 

Ende segt vrouwe volgt my nu ter stede,

 

Vraegt haerdan verneemt ghy niet alreede,

 

Seyt sy dan neen, niet van vuylen stanck

 

Spreeckt dan blydelijck, dats goet Godt danck,

 

Want den duyvel moet wech, hy en macher niet dueren

 

Hy ruymt met stanck, dies moet hy treuren,

 

Staet dan op, ende seght vrouwe ghoet

 

Botert als ghy wilt, ghy sult vinden boet,

 

Neemt dan terstont al dat zy v gheeft

 

Ende pact v uyten huyse, eer dat ghy sneeft,

 

Eer de Meester, of de knapen comen te huys, siet,

 

Zy soudent v nemen, ghy en hielt een gruys, niet,

 

Sy souden v oock kloppen, ghy most het verdraghen

[p. 99]

 

aant.

 

Dat ghy t'wel deerlijck soud moghen beklaghen,

 

Maer wat ghy krijght deelt dat in tghemeyn

 

Want de rechte broederen doen dat certeyn,

 

Sy en houden niet verborghen groot noch kleyn,

 

Daer nae loopt in Wijn oft Bierhuys,

 

Sprekende stoutelijck sonder confuys,

 

Soo ghy daer vint Heere, Ridders ende knapen,

 

Leecken, Klercken ende Papen,

 

Soo sult ghy daer nieuwen dinghen beginnen,

 

Te segghen van weyspel ende van minnen,

 

Van Hasen, van Herten, ende van iaghen,

 

Daer af suldy spreken ende ghewaghen,

 

Vant Ghevoghelte, van Valcken, ende Honden,

 

Van steeken Tournoyen, ende Tafel-ronden,

 

Van rennen, van loopen, ende van rijden

 

Van schermen van vechten, ende van strijden,

 

Ende van andere diergelijcken dinghen,

 

Sult ghy altoos spreken ende zinghen,

 

Gheeft v dan yemandt geldt, goet oft ghewere,

 

Neemt dat altoos en danct hem seere,

 

Houden zy v daer te drincken den wijn,

 

En weyghert v niet met hun vrolijck te zijn

 

Hout v dinghen alsoo in eeren

[p. 100]

 

aant.

 

Dat ghy met alleman meught verkeeren

 

Sulcx voeght de broeders die inder Oorden zijn,

 

Deelt int gemeyne wat ghy hebt verjaeght fijn,

 

t Zy van pensen, worsten, vleysch oft broot,

 

Hout niet verborgen kleyn noch groot,

 

Weest vrolijck ende blijdelijck vergaert,

 

Ende giet goet bier in uwen baert

 

Tast mede toe, t' zy hier of daer,

 

Hy salt wel betalen voorwaer

 

Die v Borghe niet en wilde wesen.

 

Alsmen den Reventer heeft gheleesen,

 

Soo zuldy sitten als der boeven weert,

 

En hebben u tottet dobbel-bart ghekeert,

 

Werpende alomme een kansse,

 

Het wert een ase, ofte een schansse,

 

Kunt ghy dan werpen, oft setten den steen,

 

Datter veel kanssen vallen, ofte gheen,

 

Soo meught ghy lichtelijck goet ghewinnen

 

Maer ist dat die steenen niet en loopen nae v zinnen,

 

Ende dat ghy het spel hebt verlooren,

 

Soo springt op met grooten tooren,

 

Ende segt: Ghy boeven de steenen zijn vals,

 

Met dien slaet daer een van allen aenden hals,

 

Aen zijn hooft, oft elders klaer,

 

Ghy sult by avontuyren een vinden daer

[p. 101]

 

aant.

 

Die hem der Oorden oock wil verstaen,

 

Ende dien weder aen v ooren sal slaen,

 

Soo hy wil nemen een Bier-kan,

 

Ende absolveeren u vanden Ban.

 

Soo doet hy v rechte broederlijcke liefde an,

 

Hy doet v deught voort wegh als een man,

 

Ende doet ooc zijn beste met ganscher vlijten,

 

Dat v die vloyen niet meer soude bijten,

 

Want dat behoort alle die broeders toe,

 

Tot allen tijden spade, ende vroe,

 

Huyden ghebroeders, ende morghen slaghen,

 

Sulcken Oorden moeten de broeders draghen,

 

Als ghy dus onder malkanderen corrigeert,

 

En vanden zonden d'een d'ander absolveert,

 

Lust v dan te drincken, maect luttel gheschals,

 

Wanneer u het bloet loopt over den hals,

 

Weet ghy wat ghy alsdan moet doen,

 

Ghy sult spreeken van eenen nieuwen soen,

 

Makende den peys, ende houden vrede,

 

d'Een den ander om vergiffenisse bede,

 

En beloven malkander byder Oorden verval,

 

Dat d'een vanden ander niet scheyden en sal,

 

Ende zittet weder neder aldaer ter steede,

 

Suypt v dan vol en sat, bevesticht v vrede,

 

Alle dit suldy alsoo volbringhen

[p. 102]

 

aant.

 

Met drincken, en klincken, en vrolijck zinghen,

 

In der manieren, soo in v Reghel steet.

 

Soo wat broeder gheldt ofte kleedt,

 

Met hem slapen draecht, t'is openbaer

 

Hy en hout den Eedt der Oorden niet voorwaer,

 

Maer hy is buyten zijnen reghel ghetreden

 

Daerom segghe ick v met corte reeden,

 

Hebt ghy gheldt, oft eenich pandt

 

Maeckt v dat quijt, hout niet ter handt,

 

Ende onderhoudt des Oordens recht

 

Soo ghy wilt zijn een ghetrouwe knecht,

 

Ende daer toe een ghetrouwe broeder

 

Soo en behout noch rock noch voeder,

 

En verberght noch hose noch lappe

 

Maer versettet alle voor den tappe.

 

Wanneer ghy drinckt, soo drinckt alsoo

 

Dat al v gantsche lijf is vro,

 

Ende als v dan den slaep bestaet

 

Oft v Tonghe op Platijnen gaet,

 

Dat ghy dan wel soud willen rusten

 

Soeckt dan al om hebt ghy slapens lusten,

 

En mach v dan gheen bed geschien

 

Soo kruypt in eenen hoeck midtsdien,

 

Want de bedden zijn de broeders te duyre

 

Daerom loopen sy slapen in eenen schuere,

 

Ja, ja Rabauts Oorden, tot uwer eeren

[p. 103]

 

aant.

 

Leue ick langhe, ick sal v vermeeren,

 

Als ick dan coome in een Taveeren,

 

Al dat ick hebbe, moet ick ontbeeren,

 

Dan comen de Teerlinghen int breede

 

Die seggen mijn stelt v in vreede,

 

Ende set v neder, ghy goede gheselle fijn

 

Om wt te trecken alle de kleederen dijn,

 

Want den Teerlingh is van sulcker aert

 

Dat hy noch geldt, noch kleederen en spaert,

 

Verstaet ghy der Kanse niet, speelt met de Kaert.

 

Hier volghen de broeders die doen ter tijdt

 

In de Oorden waren met kleyn profijt,

 

Sinte magher had haer een Wet ghestelt

 

Zy hebbense gehouden meest sonder geldt,

 

Dunne ghekleedt sonder koussen of schoenen mede

 

In haer schappray was geen twist maer altijt vrede,

 

Haer vrienden en hebben om 't goet niet ghekeuen

 

Maer sy sijn sinte Maghers Wet ghetrou ghebleuen.

Hol-kake.	Selden-sat.
Ruym-schotel.	Droogh-pot.
Tijt-verlies	Spil penning.
Schaemt v niet.	Onbescheyden.
Druyp-neuse.	Klipper-tant.
Vroegh bedoruen.	Sonder-werck.
Grooten hongher.	Sonder geldt.
aant.

[p. 104]

Achter der Haghen,	Leghen waghen,
Spaert niet.	Deur-slagh.

Onghewasschen. Sonder vet. Vrou vuyl

Ghebroken pot. Gebonden Schotel mee

Dese koocten de spijs in eenen beslijcten kuyl
En dienden ooc ter Tafelen om te hebben vre

Daer waren noch meer broeders met hopen
Ic kanse niet noemen al sie ickse loopen.

Finis.