Trotwaer. Jaargang 16

[p. 29]

Josse de Haan
Syklus fan in do en in ik

1

de romte tusken de ik
en de do yn it gedicht
is helder, oan te fielen, wier

[p. 30]

2

bûten ferskine noch noait betochte
gebouwen troch de delfallen
blêden, dizenich yn de tûken

[p. 31]

3

auto's moetsje harren sels op 'e horizon
en yn harren sels, de reade oerwei knippert
in trein gûnzet yn himsels, werom

[p. 32]

4

it leech wetter leit spoaren bleat en rudiminten
fan in ferlerne tiid, it wetter waakst
in hân fait sêft en waarm

[p. 33]

5

it heech wetter faget alle pine foarby
it waad leit stoarmjend stil
in lette seehûn rint de lêste wacht.