Trotwaer. Jaargang 8

[p. 379]

Teake Oppewal
Fers

Sa net, heit, ikke.

Guon binne der
dy spuije op it nêst
dêr 't se tsjin it aei oan hikken,
skoppe tsjin de beam
dêr 't se tein yn binne.
Sa net, heit, ikke
wês dêrfan gerêst -
mar hoe kin ik op in tûke sitte
dy 't yn jim tiid noch libbe
mar my hjoed gjin wissichheit mear skinkt?
Oare tûken sil ik brûke
foar it meitsjen fan in eigen nêst.
Bid, bid allinne ditte:
O God, hâld him fêst
dat er net út de beam falt
en fordrinkt.