Trotwaer. Jaargang 6

[p. 102]

Daniël Daen
Fersen

In Atlanta drong een Vietnam-veteraan een katholieke kerk binnen en schoot met een geweer op een crucifix. Hij werd aangehouden.

Rekrut of feteraen

mei ús kultuer-patroanen
lade wy de wapens
ús leauwe is al kûgelroun
ús ékonomyske systemen en politike leardens
bin' oant formoardzjen boun
dus wurdt der sketten op hwa't libje wol
de moardners gean frij út
de wrâld is ommers fan tofolle libben fol
hwat seit ien mear of minder de rekrút
bin'wy net dutsen fan de goaden
jow net de heechste wearden ús frij baen
mar sjit net as in feteraen
op deade crucifix-symboalen
hwa soe oan sokken net de finzenis jaen

[p. 103]

Forfjemding

eefkes thús wer foar in kear
jow ik mij del foar kachel en thé
Ik wyt nou alles ek net mear.
Bleaun is de sfear fan himel en hel

ik praet mei myn oarsprong fiif-en-sawntich jier âld
har fingers omheech stiif fan biwâld.
Fan tsjerke en leauwe bliuwe sy wis.
Forlern de illúzje dat der eat foroare is

As ik in slach de buorren troch gean
slute huzen en biwenners my yn.
Sil it forline dan nea forgean?
Binearjend finzenskip oanfierd fan wyn

As ik fuort ryd yn klaksons en ljochten
leit de forfrjemding al op snelheit yn 'e bochten.

[p. 104]

Daniel Daen
Koumelker-koster

swart giet er yn syn pak en aerd ûnder in swarte hoed
ronfels en knûkels fortelle har grommelich forhael
in breukbân bollet it krús fan lea en libben
koster Janus rint troch it doarp mei in gesicht as in kwael

seldsum goed binne syn dagen as er it leed omseit:
‘heden is van ons heen gegaan......’ it lieden fan de klokken
‘onze geliefde broeder...... gehuwd Trijntje...’ syn wyt boesgroen
‘de begrafenis is bepaald......’ syn swart forsliten skoen

hy leit de liken ôf yn great geniet, is dan biret:
‘it lêste himd past ommers eltsenien ek dizze frek
de klean bin'al oerdien it goud yn 'e mûle noch net
mei syn libben is ek syn kwea forgien hjoed al foargoed
foar mij binne inkeld de deaden from en froed’

koster-koumelker Janus slacht gjin freedsmerk oer
en stiet net ta dat in Amerikaen op 'e moanne komt
‘dat is God mei my iens ek al bin ik gjin boer’
mar op 'e merk forlieze leauwe en kij it fan in kafé-hoer

kweawillige geroften forbrekke syn iennige privé
hwat dogge de leden fan de censura morem-kommisje?
‘net ien hat er by west’ dus drinke se thé
bûten fordraecht de pastorije dat se it tsjin 'e muorren wer útpisje

wer stiet in snein mei Janus foar 'e tsjerke op 'e stoepe
ier hat er de klokken let en noch komme guoddens tolet
hy wol se wol útflokke, mar earst dûmny út de konsistoarje roppe
ûnder it votum jowt er him del yn 'e Efterste bank
sneins glydt it wurd fan de Heare as op Freed de drank