Trotwaer. Jaargang 6

[p. 74]

Joop Boomsma
In pear menuten ut it libben fan Dunnik

1.

ELKENIEN

rint hurd, rint hurder. Autoos skouwe troch de strjitte en reagje fytsers oan 'e kant.

Forkearsljochten: read
grien
oranje
readgrienoranje

In âld man (Dunnik tinkt dat de man âld is)
(Hy sjocht der âld út)
(Syn klean, hoed, skuon, kop binne âld) stiet op it gongpaed en teart in krante iepen. Hy krijt in triuw. Stroffelt oer in jiskefet en slaet mei de holle tsjin de tegels. Nimmen helpt him oerein.

Dunnik freget him ou hwat der barre sil:

-	de man hat in gat yn 'e holle, is yn 'e sûs en stjert fannacht,
-	immen skopt him fan de tegels ou, in auto docht de rest,
-	der komt in dominé of in

Mar de man stiet al wer. Hy faget de smoargens fan syn reinjas. (Hwer is syn hoed?). De krante hat er noch hyltyd fêst.

Dunnik suchtet. Hy lit it gordyn los en giet sitten. De krante

GEISER BLEEF LOPEN: VERLOOFD PAAR DOOD Utrecht - Twee studenten, de 22-jarige M.R. Velema uit Utrecht en haar 23-jarige verloofde E. Maassen uit Delft werden gistermiddag door andere kamerbewoners dood aangetroffen onder de douche in een woning in de Domstad.

hat er al lêzen. De radio is op de klassike toer. Dunnik giet wer oerein en makket der HILVERSUM III (het stasjonvandetoekomst en dat zal ook altijd wel blijven) fan.

2.

De pindule op de skoarstien (letter hawwe se de tik der út helje litten). Heit sit neist de skoarstien deun by de kachel/achter de krante/oerhimd iepen/toffels op 'e teannen/sei noait folle.

DE REST FAN NEAT SIZZE, it tikjen fan de pindule, it ritseljen fan krante-

[p. 75]

papier. Mem warber yn de keuken: thé - moarnsbrochje - kofje - middeisiten - thé - jounsiten - kofje.

De âlde meubeltsjes!!! Fral de kast mei de 46 griene en de 2 wite rútsjes. Hwat wiene se greatsk as der hwat nijs yn 'e hûs kaem. Earst it dressoir, de roune tafel mei in kanten kleedtsje (buorfrou hie mei de frouljusforiening yn Brugge west) ûnder de glêsplaet, planten. Jimmer wer nije planten. Linkenoan fornijde him, sa like it, it hûs mei hyltyd wer oare rommel, meubels, bihang, planten.

ALLINNE: sý waerden stiller nei 't se it ûnbigryplike yn de wrâld faker prebearden to bigripem

Se smookten en diene der it swijen ta.

Hwat soene se biprate: it hie goed west.

Dunnik draeide him nei har ta.

It lekken hiene se fan it bed trape.

Hy lei syn hân op har búk,

aeide har fenusheuvel en

wuolle yn it fochtige hier.

Net dwaen.

- Fynst it net lekker mear?

- It docht in bytsje sear... dêr.

Syn hân omklamme har boarst.

- Hy is wer fuortkrûpt, de rakkert!

Mei tûme en wiisfïnger prebearde Dunnik

de tepel wer hurd to meitsjen.

Se rydboske en

kroep tichter tsjin him oan.

- Lekker!

- Soks moatst net to lûd roppe.

Ik pak dy fuortdaliks wer.

Se lake lûd en

joech him in triuw.

Dunnik luts har ûnder him.

Se aksele sabeare tsjin.

Se skattere.

- DUNNIK! HWAT DOCHSTOU DER!!?

Heit: mûle iepen

yn syn eagen: net bigripen

hân oan de kruk fan de doar/knûkels wyt.

[p. 76]

3.

De heit dy't moarns al nei it wurk ta wie as wy fan bêd ou kamen en (faek) thúskaem as wy der al wer yn leinen -

4.

HILVERSUM III - the big sound on radio -

Blood Sweat & Tears:

I can swear there
ain 't no heaven
and I pray
there ain 't no hell

Dunnik drukt de radio út. De stilte duorret mar in tel.

Forkearslûden.

Dunnik rint nei it buro en lêst lûdop hwat er in healûre lyn skreaun hat:

Litte wy ússels net langer bidonderje: autonomy is forfeelsum. Fansels is de minske autonoom. Sa'n opmerking is neat bysûnders. Mar it falt net ta to kiezen as men der fan oertsjûge rekket it hat gjin doel en lit foarkar jilde. Dat iene paed moatte wy mije om ússels de konsikwinsje fan in abslút willekeurige kar de oare kant út oantwingje to kinnen -

Dunnik gnysket: - Djip, mar flauwekul.

Hy lûkt it gordyn fansiden. De âld man skarrelt nochby it jiskefet om. (Hwer is syn hoed?). De krante hat er yn de bûse fan syn reinjas stutsen.

TILLEFOAN!!

- Dunnik. (..)

- Né. (..)

Wier net mem. Ik ha 't ougryslik drok. Nije wike twa tentamens. (..)

- Fansels. (..)

- Ja.(..)

- Ja.(..)

- It oare wykein grif. (..)

- Mem ik... (..)

- Mem.. (..)

- Mem, der is immen oan de doar. Ik moat dellizze. (..)

- Ja, ik.. (..)

- Ik skilje wolris. Dach.

5.

H.B.S. en fuort dêrnei de R.U. yn Grins. Wykeins thús. De wrâld waerd in sirkel. Thús (meubels/planten/heit/mem/oare meubels/oare panten) skou de linkenoan

[p. 77]

nei de râne fan dy sirkel. Heit (18-5-1913) en mem (2-11-1916): NIJE SIRKEL, lyts en fier fuort. In tsjerke oan de himel. Dochs in rêstpunt, by de tiid.

Heit syndea (8-1-1971):

HIER RUST
ONZE LIEVE MAN
EN VADER
1913-1971
hij ruste in vrede

Mem ynienen wer yn de wrâld/sirkel: der wie sa folle to regeljen.

- Nou hawwe wy hielendal forgetten muoike Antsje in kaert to stjûren!

Mar dy wennet dochs neist Freark-en-dy.

Wis, mar at se gjin kaert krijt komt se net.

Tentamens: mem wer nei de râne fan de sirkel.

6.

Dunnik sjocht nei de tillefoan. Lûkt oan de skouders. Rint nei it finster.

De âld man is der net mear.

Dunnik triuwt in pakje sigretten yn 'e bûse, rint de trep ou. Nei bûten.

Earst in pils.