Trotwaer. Jaargang 6

[p. 70]

[Nummer 2]

Tsjebbe Hettinga
Fersen

Kleur bikend

it bloed fan
sybearje
- dat sydlings dochs oan bearen tinken docht -
falt fuort net op
op de russyske flage

sa falle konsintraesjekampen
- dy rjochtstrings oan ûnrjocht tinken dogge -
fuort net op
ûnder de kamouflearjende flage
fan de snijende flok

mar
it each fan de frijheit
hat gjin hoarizon
ken gjin gerdyn

de kleur is bikind
polyt burokraten
jimme hammer
slacht sikers mei koppen
jimme sichte
is bismodze
mei minsklik-streamend
bloed
dat jimme as krúsige flage
wolkom hiet
oan jimme swarte sé
fan jimme formoarde systeem

[p. 71]

Dream

sidesêft
wurdstou wekker út myn widzjen
dou streakest mij as in dounsjend dûnsfearke
en mei de waermens fan dyn neijens
setst myn sliep oer yn slomme
jong bern oan dyn sjongende boarsten
ik

yn de tatroddeljende takomst
fan dizze trintene dream
forflean ik ús lok ûnder myn wjok
in tiidleas fleanen
de einleaze driuw
omheech

ik flean boppe de séën fan dyn eagen
blau as de romte fan de dream
it brek fan it forline forlern
de takomst as bliksembal kommen
yn myn djipste groun foun ik dij
werom

dou draechster fan myn dream
makkest mij wekker yn dij

dan
foltôget him it drama fan de dream
de forskrikking fan de wurklikheit
allinne litten as sinne sûnder skaed
streamt leadgriis let moarnljocht
as leagen yn myn eagen
stielhurd

[p. 72]

Tiid en romte

it wurdt tiid
de tiid lyk to setten lju

hwant
it is net
de mechanyske hoanne
dy't de tiid
fan sinne en dei seit
lykas ek de tiid
net tikket
foar de fûst
mar yn de pols

ek wurdt it tiid
de romte to foljen
mei oar ark as
fier yn it roun-rikjende
segaren
fan de djûre merken
usa en ussr

hwant
it is net
de elektroanyske fûgel
dy't de romte
fan ierde en sinne seit
lykas ek de romte
gjin stâl kriget
yn it bûtenlân
mar yn it binnenlân
fan it hert