Trotwaer. Jaargang 6

[p. 13]

[Steven de Jong (vervolg)]

Degeneraesjekonflikt

't wie in bêste man hear
dêr net om
twa wrâldkrigen hiene syn wize holle
knûkere ta in rottige jerappel
en syn hier ferve as dat fan sinterklaes

‘ik ha jou heit noch kinnen’
sei er
‘en jou mem
it wiene bêste minsken
dêr net om
mar
it hie better west
as se mekoar noait kend hiene
it hie better west
foar allebeide’

hy seach my oan as wie er
ús leaven heare sels
hy eare myn âlden lykas
de skrift dat fan ús freget
mar
hwat tocht er yn 'e godsnamme fan my
en fan myn bern

't wie in bêste man hear
dêr net om

[p. 14]

Mislearre kabaretlietsje

ik woe in simpel ferske skriuwe
oer in hij en in sij
mar it moast rymje
en dêr wie ik to lui foar

it gie oer Sara en Hassan
hij wie 16 en sij 15
och it wiene noch bern
Sara de Israëlyske
en Hassan de Palestijn
se wennen ûnskuldich sa frij en fijn
by heit en mem
och wol hwat bretael soms

mar meastal forlegen

en as in segen
foar heit en mem
yn Jeruzalem

yn Jeruzalem

mar sij koe him wol deasjen
en hij har wol opfrette

Sara Sara Sara pas op
Hassan Hassan tink om dyn kop

mar as hij de mûle iependocht
(om har op to fretten dus)
en sij syn geve tosken sjocht
wyt ljochtsjend yn syn swarte plúsburd
dan tinkt se: ‘hwat in knappe fint’
en har dûnkere egen sjitte feninich
pylken fol fjûr lyk

yn syn hert

en dan ja dan wyt Hassan it net
o leave heit o leave mem
hwerom wenje wy dochs yn Jeruzalem
Sara Sara Sara pas op
Hassan Hassan tink om dyn kop

en hij tinkt dat er Adam is
en sij tinkt dat se Eva is
en hij ropt Allah
en sij Jahwèh
se draeije har om

fan rombom bom

is dat de feesttrom

of in bom

yn Jeruzalem

yn Jeruzalem?

Sara Sara Sara pas op
Hassan Hassan tink om dyn kop