Trotwaer. Jaargang 2

[p. 4]

Redaksioneel

Dit supplemint fan trotwaer tsjûget fan 'e jammerdearlike tastân, dêr't ús tydskrift troch finansiële swierrichheden yn forkeart. It tsjûget ek fan ús writen dêr hwat oan to dwaen. Fierders biwiist it dat wy yn in soarte fan ‘underground-foarm’ wol trochdraeije kinne. Wy wolle lykwols dat trotwaer in offisieel podium bliuwt, in koartsthermometer, mar tagelyk in fisitekaertsje fan 'e HJOEDDEISKE literatuer yn Fryslân.

Wy dogge in birop om meiwurking op elkenien, dy't him of har op hwat foar wize dan ek mei Fryske skriuwerij dwaende hâldt. Fryslân kin him de wielde fan 'e ûndergong fan trotwaer net permittearje.

Us tsjinstanners en haters wolle wy net bikeare, mar har der yn alle biskiedenheit op wize, dat se mei de forneatiging fan trotwaer har eigen kulturele glêzen yn smite. Sûnder trotwaer wurdt it Frysk binnen de koartste tiid in deade tael (foarsafier't it dan in tael is). Sels de Ljouwerter Krante bigjint dat lang om let (d.w.s. 2 jier to let) yn to sjen.

Trotwaer is in literair tydskrift en dus gjin kommersieel artikel. Wy moatte it lyk as alle literaire tydskriften ha fan subsydzje. Dy krije wy dan ek fan C.R.M.. It Frysk makket trotwaer noch minder kommersieel. Wy ha dus mear subsydzje nedich en dy forwachtsje wy fan 'e Provinsje. Wy dogge dêrom út namme fan alle Greate Pieren en binammen lytse wjirms yn 'e Fryske lettertún in birop op de provinsiale autoriteiten dy't oer ús subsydzje to kedizen ha, trotwaer net stikke to litten.

Om alle misforstân foar to kommen; trotwaer wol NET wêze:

In blomlêzend tydskrift, dêr't elkenien him mei konformearje kin.

In podium foar in lytse clan, dy't tafallich de macht forovere hat.

In reklamefolder foar bg. Miedema Pers, V.V.V. of F.N.P.

[p. 5]

Trotwaer wol AL wêze:

In krityske bigelieding fan forskinende Fryske literatuer.

In tydskrift mei wurk fan sa goed mooglike kwaliteit.

In tydskrift, dêr't gâns ‘domenys’, ‘skoalmasters’ en ‘leararen’ argewaesje fan ha sille.

In yn prinsipe iepen podium foar alle Fryske skriuwers fan Gerben Abma oant en mei Geart van der Z_waag, dy't yn 'e rubryk trioel har galle spuije kinne oer inoar, oer trotwaer, oer alle mooglike saken (Wy ha noch noait op prinsipiële grounen in trioelstik wegere. Dizze iepenheit moat bliuwe.).

Trotwaer is dus gjin ‘skriuwersboun’, mar mear in skriuwersslach(t)fjild, dêr't gêns op ôffochten is en wurde sil (hoopje wy). As sadanich hat it in muoisum bistean, binammen yn in lange-teannengebiet as Fryslân, mar allinne sa hat in literair tydskrift sin.

Wy binne ús biwust, dat wy lang net oan ús eigen easken foldien hawwe, mar wy ha ek noch lang net it gefoel, dat wy der mar mei ophâlde moatte. Nettsjinsteande 't rot waer is Fryslân foar ús gjin hopeleaze saek. It kin dat wurde as trotwaer gjin bisteansmooglikheden mear hat. Dêrom noch ris in birop op tsjinstanners, meistanners, bitankjende abonné's, abonné's mei in bytsje geduld (jim krije de suppleminten ek tastjûrd) en mei in protte geduld en binammen op de autoriteiten, dy't in ton to fordielen ha foar de Fryske kultuer.

Redaksje.