Trotwaer. Jaargang 2

Parradys / Hein Faber

Iepen allinne nei de stjerren
Leit hymjend yn de simmernacht
De binnenpleats fan't flatgebou
En sûcht de koele nachtloft yn
As wie't de koker fan in skip.
De finsterglêzen bylkje as
gril forljochte skilderijen
oan donk're muorren.
Mar de iepen fekken spuije
har lûden as in wieljend stream
fan klanken yn't muorrefjouwerkant.
De jammerklacht fan in mishandelde fioele
beart nuver by it rêd getinkel
fan firtuoas pianospul.
In gramofoan, dy't hieltyd op 'e nij
it liet fan de Torero sjongt
wol mar net strike mei it trochinoar
fan radio's op't lûdst.
Deun neist elkoar it geijend laitsjen
en lûd petear fan lju by wyn en drank
en nea ophâldend byljend hoastjen.
Efter tichte ruten draeije sliepers
har om en om.

uitgez. 15-2-'70