Trotwaer. Jaargang 2

Tiny Mulder / Wenning

de lea
myn lea, mei ik njonkenlytsen wol sizze,
wurde my hwat langer hwat fortrouder.
se bigjinne einlings
lekker to sitten;
it fel mei hwat ronfels en tearen
foar de ekstra romte
dy't in minske noflik fynt.

njonkenlytsen drukke de lytse spierkes út
hwat ik altyd al bidoeld haw.
ik kin suver de takomst al aerdich
foarsizze út de tearen dy't ik,
dan waerm dan kâld,
sels foarme haw.

ik soe net graech yn nije lea stappe,
nou't ik my einlings nei't sin
ynrjochte haw.

en hwat moat dat skielk wurde
mei dat nije lichem
dat ús tasein is;
hwa moat dêryn wenje? ik?

uitgez. 4-2-'70