Sommighe leerachtighe geestelijcke liedekens

De thien gheboden des Heeren, Exod. 20.

Singt met aendacht.

[p. 554]

 

Heft op u hart opent u ooren,

 

Ghy haer volc end traech int verslaen

 

Wilt uwes Gods stemme nu hooren

 

End sijn gheboden gade slaen.

 

2 Ick ben (seyt hy) u God end Heere,

 

Die u hebbe ghemaeckt gantsch vry,

 

Van t'jock twelck u beswaerde seere,

 

Hebt gheen andren God neven my,

 

3 Laet u gheen beelt maken noch snijden

 

Van eenich dinck int aertsche dal,

 

So ghy die eert t'eenighen tijden,

 

Vwe God seer jeloers zijn sal,

 

4 Ydelijck sijnen naem ghepresen,

 

Sult ghy niet nemen inden mont,

 

Want hy sal niet onschuldich wesen,

 

Die dien misbruyckt t'eenigher stont.

 

5 Arbeyt ses daghen, end met lusten,

 

Viert den sevensten Gods woort smaeckt,

 

Want God wild' op dien dach self rusten,

 

Van t'werck dat hy hadde ghemaeckt.

 

6 Vader en moeder sult ghy eeren,

 

Op dat ghy langh' in voorspoet leeft,

 

End op aerden seer meucht vermeeren,

 

Die u God tot den Herberch gheeft,

 

7 Dootslach end toorne sult ghy mijden

 

Al oncuysheyt vliet end afbreeckt,

 

Steelt niet al most ghy ghebreck lijden,

 

Gheen valsch ghetuychenisse spreeckt,

 

8 Van begheeren sult ghy u wachten,

 

Des naesten huys end wijf nu voort,

[p. 555]

 

Na sijn knecht oft vee wilt niet trachten

 

Noch na al dat hem toebehoort.

 

9 O God u woort seer groot van machten

 

Luyt claerder dan eenich metael,

 

Gheeft ons de ghenaed' ende crachten,

 

Om dit te houden al te mael.