Sommighe leerachtighe geestelijcke liedekens

[Aenhoort uwen roep al t'samen]

Na de wijse: Sy lieten my daer alleyne staen.

Singt met aendacht.

[p. 28]

 

^a Aenhoort uwen roep al t'samen,

 

Lieve broeders en susters ghemeyn,

 

Met veel rijcke na t'betamen,

 

Noch edel van state reyn,

 

En zijnder gheroepen in s'Hemels pleyn,

 

Die lust hebben in de werelt,

 

En Gods woort achten seer cleyn.

 

2^b Niet veel wijse na den vleesche,

 

En zijnder gheroepen voorwaer,

 

^c Maer die arme zijn van gheeste,

 

Die sullen verblijden hier naer,

 

Al zijnse vervolcht hier ende daer,

 

God heeftse al uytvercoren,

 

^d Dus vreest niet ghy cleyne schaer.

 

3 Denckt hoe veel datter waren,

 

Bevrijt en behouden voor scha,

 

^e Doen Noë sijn achtster ginck varen,

 

En de werelt verginck om die qua,

 

^f En als de vijf steden van Sodoma,

 

Met den vuere verginghen,

 

En wasser maer drie door Gods ghenae.

 

4^g Van ses hondert duysent personen,

 

En quamender maer twee int lant,

 

^h Van Beloften seer schoone,

 

Dwelck was seer triumphant,

 

Dat is een figuer, vaet dit verstant,

 

Al op dat eewich leven,

 

Dat lieflijck is ende plaeysant.

 

5 Sy waren niet al aenghename,

 

ⁱ Die met Gideon souden staen,

a 1. Cor. 1. 24.

b 1. Cor. 1. 24.

c Mat. 5. 3.

d Luce 12. 32.

e Gen 7. 7. ende 13. 21.

f Gen. 19. 24.

g Exod. 13. 37.

h Num. 13. 27.

i Iud. 7. 6.

[p. 29]

 

Dan drie hondert eersame,

 

Die uyter hant lecten saen,

 

Die bevreest waren hiermen t'huyswaerts gaen,

 

Want sy niet sijn bequame.

 

Om teghen die vyanden staen.

 

6 Zacharias (wilt dit mercken)

 

Schrijft in sijn derthiende claer,

 

^k Dat Gods volck in drie percken,

 

Sal ghestelt zij ende twee voorwaer,

 

Werden uytgeroyt, maer de derde schaer,

 

Wert als gout door den vyere,

 

Gheloutert, dit is openbaer.

 

7^l Een stadt vol alder goeden,

 

Wees den Enghel Esdras goedertier,

 

Wiens wegh (wilt dit bevroeden,)

 

Is maer eens menschen voet breet fier,

 

Op d'een sijde water en op d'andre vyer,

 

Hoe condt ghy daer in gheraken,

 

Ghy en doorgaet dat nauwe eerst hier.

 

8 Noch schrijft Esdras verheven,

 

^m Int vierde boeck int achtste seer claer,

 

Datter veel gheschapen sal wesen,

 

Maer weynich behouden hier naer,

 

En ghelijck datmen vint veel aerde swaer,

 

Om aerden vaten te maken,

 

maer luttel om gouden t'is openbaer.

 

9ⁿ Ghelijck die groote vloeden al,

 

meerder zijn dan een druppel soet,

 

So is der Godlooser ghetal,

k Zach. 13. 8.

l 4. Esd. 7. 6.

m 4. Esdr. 8. 2.

n 4. Esd. 9. 15.

[p. 30]

 

Meerder dan Gods kinderen goet,

 

Och hoe claechelijck ist, zijt dies wel vroet,

 

O menschen wilt u bekeeren,

 

Ende niet meer sonde en doet.

 

10^o Oock spreeckt Christus verheven,

 

Dat de wegh is smal en cleyn,

 

⁺ Die daer leyt tot den leven,

 

En luttel vinden hem certeyn,

 

Dus wilt u maken van sonden reyn

 

En leven na t'woort des Heeren,

 

Op dat ghy comt by Christum ghemeyn.

 

11 De wegh is groot en wijde

 

⁺ Die ter hellen leyt wilt dit verstaen

 

Sy gaen derwaerts aen alle zijde,

 

So de Schriftuere ons doet vermaen,

 

^q Want de Helle heeft haer wijdt open gedaen

 

So wy in Esaias lesen,

 

En veel zijnder die daer in gaen.

 

12 Noch stater claer wilt hooren,

 

^r Datter veel gheroepen zijn

 

maer weynich uytvercoren,

 

Spreeckt Christus, verstaet wel mijn,

 

Want sy niet en trecken eene lijn

 

^s maer beminnen de duysterheden,

 

meer dan het clare sonne schijn.

 

13 Schickt u na de behoorte,

 

^t Spreeckt de Jeere, verstaet dit al,

 

Dat ghy al door de poorte

 

In gaet die daer is seer smal,

 

want menich daer na arbeyden sal

o 4. Esdr. 7. 7.

+ matt. 7. 13.

+ matt. 7. 13.

q Esd. 5. 14.

r matth. 20. 16. ende 22. 14.

s Ioan. 1. 5. ende 3. 10.

t Lu. 13. 22.

[p. 31]

 

Ende en sal daer niet in comen,

 

Om dat hy niet en is vant ghetal.

 

14^v Tis tijdt (heeft Petrus gheschreven)

 

dat d'oordeel haer sal comen aen,

 

Al die gherechtelijck leven,

 

Ghelijck kinderen Gods onderdaen:⁺

 

^x Ist dat de rechtveerdige nauwe en sal staen

 

^y Int boeck des levens ghepresen

 

⁺ Hoe salt met den ongheloovighen gaen.

 

15 Broeders en susters reene,

 

Bidt voor my so doen ick voor dy

 

Op dat wy alghemeene

 

moghen gaen door desen wegh vro,

 

So sullen wy hier namaels wesen bly,

 

Als wy by een vergaren,

 

haer niet dan eeuwighe vreucht en zy.

v 1. Pet. 4. 17.

+ Luc. 23. 30.

x Pro. 11. 21.

y Apo. 13. 8. ende 17. 8. ende 21. 27.

+ 1. Pet. 4. 18.