Sommighe nieuwe schriftuerlijcke liedekens, ghemaeckt uyt den ouden ende nieuwen testamente,

nu onlancx ter eeren Gods, ende tot stichtinghe des eenvuldighen sanghers by malcanderen vergadert ende uytghegheuen

Den Cxxxiij. Psalm,

op de wijse: Hy mach wel vrolijck wesen, etc.

SIet hoe fijn, en hoe lieffelijck mede,
End' hoe ghenoechlijck ist,
Dat Broederen in vrede
Woonen met eendrachtichede
By malcanderen sonder twist.

T'is ghelijck als die vermaerde

Balssem costelijck en goet,
Die vloeyt als d'onghespaerde,
Van den hoofde in den baerde,
Jae den baert van Aaron soet.

Die daer van boven verheven,

Tot in zijn cleedt af vloeyt,
Ghelijck den dauw' becleven,
Die van Hermon daelt ghedreven,
Ende de berghen Zions besproeyt.

Want den Heere onversweghen,

Die beloeft te gheven, aldaer
Zijnen troostelijcken zeghen,
En het leven al te deghen,
In der eeuwicheyt eenpaer.