Soela 1962-1964

[p. 12]

joh. schouten-elsenhout

Ini a jongoe 'manten-dow
Mi 'pokaitongo
Joe djompoe tanapoe
Lek wan boesbromki
Di moe tjar jepi kon.

Ini a faja déten-son
J'e troes ede f'mi si
A krakti f'joe gro
di e sor en srefi a mindri
Den tranga boesi-tité

Ini a mofoneti-doengroe
Mi 'pokaitongo
Joe opo tanapoe
Lek a moenkenki na loktoe so krin
Foe sor a pasi pe njoenlibi e bigin.

[p. 13]

dreten-odi

 

A wan pkin dréten ini Djoesabana

 

Mi si wan onowsroe pkin foe boesi

 

Sdon a mindri den boesbromki e pré

 

Sondro prakseri

 

- a trange libi e wakti en -

 

A bigin singi wan drétensingi

 

Gi ala den pikin boesfowroe

 

Foe fré kon na en sé.

 

Den kaperka nanga den difrenti kloroe

 

Bigin naki den fré e dansi f'prisiri lont en

 

Lek doesoen tra pkin noniwan

 

E doe te den lob wan singi

 

 

 

A bréti safri lafoe

 

A tap a fesi foe na onowsroe Gadopkin

 

D'e tjar wan esesi odi na den pkin boesmeti

 

Di onowsroe leki en

 

 

 

A winti e séri a singi na mindri den grangran

 

Te doro den tjororo,

 

Watra e lon pré nanga den todobere

 

D'e libi f'den groengroen......

 

 

 

Mi no sa frigiti mi eri libi

 

So wan swit dréten 'manten

 

Nanga en glori nin a sabana

 

Di mi si.

Ai paradoti
Goedoe gron foe Sranan
Meki wi taki anansitori
Bifo mi pré jorkabanja
Boesimama foe doti
Tata Fodoe foe gron
Ten drai gi nengre
Foe tron wan
Ari oedoe no e jep feti
Kasabagron tron boesiston
Mek abrawatra-fowroe
Bradi en fré barlafoe
Foe trowé njoensoe gi se
Mi mamadoti gongoté traga mi s'kin
Wip anoe mek poedja jere djodjo
Oen panja komopo
Lek marbonsoe na ipi
Meki njoen libipe na sépasi
Oen boesiston e séri gwe
Oen watra e kowroe foto s'kin
Gronmama ori baka
Gi den pikin foe joe
Mek sribi no lasi ai

[p. 14]

Ini a pikin alenten-dropoe
Ai mi lobi
A tapoe a djamanti pasi foe a neti
Mi si taki joe de
Nanga djomp'ati f'den doengroe jari
f'mi libi i djompo tanapoe
Lek wan owroe dren di kon troe
Wan krioro di ben e sribi
a mindri doengroe pasi f'libi
Fré opo lek wan koproprin maskita
Foe soekoe a libi di kibri en srefi
A mindri son nanga alen
A ondro den tranga roetoe f'den bontaki
fa den e wai foe tron draiwinti
Foe kanti den bigi bon alasé
Anoe na anoe ati e doro gron f'ati
Broedoe e katibo joe skin.
Ke mi krinfesi sranan oema
Nanga joe troetroe granlobi
Joe sor i srefi atapoe a gowtoe pasi
Granmorgoe
A mindri den fajalobibon.