Van sente Caterinen (1980)

Van sente Caterinen

(1980)–Anoniem Van sente Caterinen– rechtenstatus

Auteursrechtelijk beschermd


[Van sente Caterinen]
[Folio 101ra]
Si segghen alle nu montghemene Dat hi es vrai ghod allene Want vwe affeghode ne hebben macht Ne ghene wile dach no nacht 5[regelnummer] Wa<e>ndi dat ghod niet wreken ne sal Tquaet dat ghi den ke<r>stinen doet al Jahi sekerleke teghoeder trowen Ende v saels noch <wel> sere berowen Alse de keiser dit hadde ghehoert 10[regelnummer] Van sinen wiue al dese wort Hem verwandelde al sijn moet Ghelijc dat enen verwoetden doet Om datter liede so vele tewaren Ane ghode doe bekert dar waren 15[regelnummer] Nochtanne was hi in therte binnen Droeuer van der keiserinnen Dat soe to hem so hadde ghesproken Ende sine ghebode mede tebroken Doe seidi vrowe wat meent di 20[regelnummer] Dat ghi aldus hier spreect te mi Mi dinct dat ghi sijt verkert Ende hebt der kerstine wet ghelert Ende ghelaten onse ghode [dit] verstaet [Seker]leke [na] der kerstine raet 25[regelnummer] Hic hebber vele ghedaen doeden Van den ghenen die mine ghoden Lieten. ende braken mijn ghebot [E]nde gheloefden ander kerstine ghod [D]at selue tempeest sie hic van v 30[regelnummer] Dat rout mi sere int herte nu
[Folio 101rb]
Het dinct mj wesen wonder groet Want ghi sijt mijn bedde ghenoet Ende mijn ghetrovde wijf Ghi sout mi lief hebben alse v lijf 35[regelnummer] Dat ghi scieghen mj wilt sijn Dat versuvaert mi therte mijn Na dien dat ghi sijt ghekert Enter kerstine wet hebt gheleert Ende mine ghode hebt ghelaten 40[regelnummer] Dat es dullede bi caritaten Want wart dat sake dat hic nu liete Dese dinc nu ghaen te nieute Binnen roeme wel vele vrouwen Souden hem houden te ghoder trowen 45[regelnummer] An vwen ghod ende laten den haren En tarna soud<en si dan tewaren>; Hare manne alle bekeren Enter kerstine wet hem leeren Dan soudic saen wel cortelike 50[regelnummer] Ontaerft sijn van minen rike Bider trovwen die hic bem sculdech Minen ghod die es machtech Ne wildi niet laten vwe dullede Enter kerstine wet oec mede 55[regelnummer] Hic sal v thoeft af doen slaen Ende als men dat heeft ghedaen So salic v doen werpen sciere Vor de vogle ende vor de diere Ay v hoft ende vwe lichgame 60[regelnummer] Was mi oit so wel bequame
[Folio 101va]
Warumme wildi nu pine groet Ghedogen ente bettre doet Hic sal v met pinen sere dwinghen Ende vwe borste af doen wringhen 65[regelnummer] So wat so doe die quade tyran Conste ghedregen alsen fel man Sone mickets niet een twijnt Alst wel scen der naer noch sijnt Doe hiet die keiser dat men tervaert 70[regelnummer] Die vrovve leedde terpassien wart Alse die keiserinne wech ghinc Dar soe die bettre doet ontfinc Doe sach soe te caterinen wart Die stout ende cone was onvervaert 75[regelnummer] Ende seide edele maegt nu doet Vwe ghebede doer vwe oemoet Tote onsen here ouer mi Dat hi altoes mi moete sijn bi En tatd hi mj hir in dit torment 80[regelnummer] Vertroesten moete ende sijn omtrent So dat altoes theloeue mijn An hem ghetrowe moete sijn Doe seide die maegt ay edele vrowe <Onsiet v niet bi miere trouwe>; 85[regelnummer] Hebt vast gheloeue an onsen here Ende roept op hem ghenade sere Hi helpt altoes wel sinen vrient Die hem hier ter trowen dient Hi sal v ouer dit curte leuen 90[regelnummer] Saen wel groete bliscap gheuen Ende ombe deanxene ente pine
[Folio 101vb]
Dar ons bede in staet te sine Sullen wi de crone van der victorie Entfaen nu saen in sine glorie 95[regelnummer] Doe wart blide die keiserinne Ende hare dochte in haren sinne Dat soe mochte ghedoeghen wel So wat tormente die ware fel Ombe de minne van onsen here 100[regelnummer] Dien soe begherde te sine sere Die cnapen ne dorstens laten niet Sine daden dat hem die keiser hiet Si bonden dier vrowen bede har hande Ende wronghen haer af altehande 105[regelnummer] Bede hare borste sonder sparen Dat was een groet torment tewaren Dar naer die keiser sententie ghaf Dat men hare sloech thoeft af Alse die daet doe was ghedaen 110[regelnummer] Doe vor soe stappans sonder waen Met ghode bouen inden troene Ende ontfinc der heelgher crone Ghelijc den andren maertelaren Die vor hare ghepassijt waren 115[regelnummer] Dar naer inde scrifture hic las Dat die keiserinne doe was Aldus ghepijnt ende doet dar lach Opten drie en tuvintechsten dach Jn nouembre dat es ghescreuen Doe ghinc porfirius dar bi nachte

Over dit hoofdstuk/artikel

titels

Van sente Caterinen