Een schone ende ghenoechelijcke historie van Ioncker Ian

Dat xxx. Capittel. Hoe Heer Ian troude des Keysers Dochter de schoone Gloriande, ende de Bruyloft worde gehouden met groote eeren.

ALs nu den nacht vergaen was ende den schoonen dach aen quam, ende de weerdige heeren ende de edele vrouwen ontweckt ende ontspronghen waren, zoo was de Bruydeghom hem selven habituerende, ende naestelijcken cleedende met schoone ende costelijcke habijten, ende alle zijn Heeren die met hem uyt Vranckrijck ghecomen waeren des ghelijckx, ende een yeghelijck Heere hadde zijnen staet bysonder achter hem volghende op haer alder costelijckste toeghemaeckt. De Bruyt was oock seer costelijck toeghemaeckt, zoo dat haer habijten wel een Landtschap waerdich waren die zy aen haer Lijff droech, haer Vrouwen volchden van achter aen oock seer costelijck toeghemaeckt. Als zy nu ter kercken quamen ende ghetrouwt waren, zoo wasser een schoon Misse ghedaen Gode ter eeren ende ter Salicheyt vanden Bruydegom ende de Bruyt. Als den dienst Gods gedaen was zo bliesmen die Basuynen ende de Trompetten ende veel ander instrumenten, de Bruydegom ende de Bruyt gingen te Hovewaert daer alle dinck bereedt was zoo costelijcken als men wel verdencken mochte, daer ginghen zy sitten ter Tafelen elck nae

[fol. H2r]

zijnen staedt, de dienaers dienden daer van als planteyt, daer was van als bereet alsoomen wel peynsen mach. De Bruydegom dede beroepen een steeckspeel daer de Fransche Heeren groote prijs ende eere behaelden, des ghelijcx deden oock des Keysers Heeren, ende dese triumphe gheduerde xl. Daghen dat men open Hoff hielt, de Mommerien ende ander triumphen die daer gehouden werden waer te lanck om te verhalen, aldus laet ick dat blijven.

De Bruydegom schonck alle de heeren costelijcke giften ter wijlen dat hy Hof hielt, alzoo dat hem alle de heeren seer bedanckten, Doen dit altesamen ghedaen was, soo namen meest alle de heeren oorlof, ende elck trock tzijnen Lande waert. De Coninck Alphonsus vertrock oock na zijn Lant en Heer Ian dede hem wtgheleyde int scheyden soo gheloofden zy malcanderen altoos by te staen ende behulpelijc te zijn, indien zy eenighe last van Vyanden ghecreeghen, ende zoo scheyden zy vriendelijc vanden anderen. De heeren wt Vrancrijck namen oock aenden Keyser oorlof ende voort aen Heer Ian, de welcke datie hoochlijcken beghifte ende hy gaf hem brieven aen den Coninck, ende aen zijn Vader ende Moeder ende so zijn zy nae Vranckrijck ghereyst.

De Soon vanden Hertoge van Borbon bleef by Heer Ian, doen de Heeren al vertrocken waeren, zoo gaf de Keyser Heer Ian ouer alle den laste vanden Landen om dat hi niet meer reysen en mochte, zoo is Heer Ian met zijn vrouwe ende met alle de Heere in grooter vreuchden gheweest, ende doe hy den last aenghevaerdt hadde, zo reysde hy van d’een Stadt in d’ander, ende daer hy sach datter ghebreck was dat verbeterde hy afstellende alle quaede polecien daer de Landen meede belast waren, ende op de Frontieren maeckte hy de steden starck tegen den aenstoot der Heydenen, doen hy dus een Iaer lanck hier meede besich ende onleedich was, zoo is Gloriande gheleghen van eenen ionghen Sone waer af tgheheel landt door groote blijschap ghemaect wert, het Kint wert Kersten ghedaen ende gheheeten Sigimundus nae de Groot vader, op de selve tijdt de Keyser ouermits dat hy seer out was van daghen wert slaende in een natuerlijcke Sieckte, zoo dat hy te bedde moeste ghaen legghen, hy maeckte zijn Testament ende begeerde aen de heeren des Landts, dat zy Heer Ian ontfanghen wilden na zijn doot als gherechte Erfghenaem int Keysserrijck. De Heeren beloofden dat zijdt doen souden. De Keyser was doen wel te vreeden, hy ontfinck zijn Kercklijcke rechten, ende daer na schiet hy van deser Werelt.

Daeromme dat grooten drucke was int Hof alsmen wel dencken mach, om haren Heere die zy verlooren hadden, men Balsemde het Lichaem ende daer werret met grooter pomperien ter aerden ghedaen. Alst al ghedaen was dat tot sulcken wtvaerde behoort, zoo zijn alle de heeren vanden lande vergadert ende hebben Heer Ian de Keyserlijcke Croone opt hooft ghesteldt, ende hebben hem Keyser ghemaeckt, twelck hi geregiert heeft seer rustelock ende vredelijck, recht doende zoo wel den Armen als den rijcken, waer door hy ouer zijn Landen seer bemindt ende ontsien worde. Corts daer na is zijn Oom de Coninck van Vranckrijck ghestorven ende ouermidts dat hy gheen Kinder achter en liet, zoo is hy de naeste gheweest vander Croonen, ende zoo is hy met grooter staete derwaerdts ghetoghen om de Croone te ontfanghen, ende doen hy daer int Landt quam zoo zijn alle de Ghenoten vergadert ende hebben hem eedt ghedaen, ende voor een Coninck ontfanghen, in welcke Crooneringhe groote triumphe bedreven worde. Doen hy daer een wijltijdts gheweest hadde in grooter ghe-

[fol. H2v]

noechten, zoo heeft hy zijnen vader bevolen het rijcke te bewaren tot behoef van zijnen joncksten Sone die hy daer oock int lant ghebrocht hadde. Daer na heeft hy oorlof ghenoomen aen zijn Vader ende Moeder ende aen alle de heeren, ende is weder nae Romen ghereyst daer hy blydelijck ontfangen worde. Daer nae leefde hy langhe in den Houwelijcker. Staedt met zijn Huysvrouwe ende in grooter vreeden, hy was van zijn Vrienden seer bemindt, ende van zijn Vyanden seer ondtsien, alzoo datter niemant en was so stout die zijn Landt dorste beschadighen, zy en hadden niet meer kinderen dan twee zonen. Ende eer hy sterf hadde hy den Ioncksten ghemaeckt Coninck van Vranckrijck gheheeten Sigimundus ende den oudtsten soude nae hem besitten tKeyser rijck ghenoempt Ioncker Ian. Ende doen hy alle zijn dinghen met consente vande Landen gheordineert ende bestelt hadde, zoo is hy cortelijcken daer nae ghestorven Salichlijcken, ende zijn Huys-vrouwe leefde omtrent een half Iaer nae hem ende rusten beyde inden heere, zoo moeten wy alle na die leuen versamen in dat eeuwige leven, dat ons wil geven, de Vader de Sone ende de H. Gheest Amen.

FINIS.