Een schone ende ghenoechelijcke historie van Ioncker Ian

Dat ij. Capittel. Hoe den Kinde gegeven wort een meester om te leeren ende onderwijsen in alle consten ende oock in alle goede manieren.

DOen dit kint seven iaren out was zoo heeft de Keyser by hem ondtboden een geleert meester inde latijnsche ende griecxe sprake ende een groot Orator geheeten Lucianus, ende heeft hem bevolen den kinde te leeren ende te onderwijsen in alle Consten, hy soudet hem grootelijcken loonen, de Meester heeft belooft zijn wterste diligentie daer inne te doen. Ende zoo heeft de Meester den Ionghen in zijn bewaringhe ghenomen, ende ten tide van acht iaren zo is de ionghe door de neersticheyt van zijn Meester zoo verre gecomen datter gheen questien en waren hy en wistese te solveren, daer en boven was hi seer vast ende expert in beide de spraken te weten int Latijn ende griecx Doen de Ionckheere nu xv. iaren out was heeft hem de Keyser doen Leeren in alle de ridderlijcke consten in welcke hy oock groote ghenuecht hadde, ende overmidts dat hy groot ende sterck van leeden was zo leerde hy zoo veel binnen een Iare datter niemandt en was binnen alle den Hove die teghen hem mochte ghedueren, int welcke de Keyser groote genuechte in zijn herte hadde, ende dochte hem cortelijck Ridder te maeken nu hadde de Keyser een dochter genaemt Gloriande die beghonste haer Liefde op desen Ionckheere te legghen alzoo dat zy menich minlyc woort met malcanderen spraken, nochtans de Ionckheere anders niet wetende dan dat het zijn Suster was, metten corsten zoo was dese Ionckheere zoo huesch ende zoo minlijck in alle sijn manieren ende woorden dat hy bemint wort van alle den houe: Op een tijt ist ghebuert dat Ioncker Ian voor den Keyser quam ende is hem te voete ghevallen seggende Heere vader waert uwen wille ick soude wel begeeren ridder te zijn zo mochte ick rijden ghelijck ander Ridders in allen Tornoyen ende steecspeelen om eer ende prijs te behalen, want my verdriet dat ick mijn sterckheyt niet ghebruycken en mach, ick soude hopen dat icket zo wel doen soude als de sommige die hier te hove zijn. De Keyser zeyde, zone ghy moet noch een weynich pacientie hebben, want ghy noch ionck ende teder van complexien zijt, alzoo en soudijs niet connen verdragen. De ionckheere sprac ende zeyde: Vader wildy my Ghelooven, ick soude my wel dorren vermeeten teghen den vroomsten van uwen hove te vechten, zo sterck kenne ick my op deeser Ure, dat segghe ick u voorwaer De Keyser dit hoorende, prees in zijn herte de couragieusheydt die hy aende Ionghen sach peynsende in hem selven dat hy noch groote Feyten van Wapenen zoude doen, ende gheloofde den Ionck-heere het eerste dat hy met alle zijn heeren hof hielt zo soude hy hem ridder maken. Nu waren der sommighe in de Keysers hove diet seer benijden, ende en mochten niet lijden dat die Keyser desen Ionckheere in zoo grooter eeren hielt wel weetende dat hy een vondelinck was, sorghende de Keyser ouermits dat hy een out man

[fol. A3r]

was ende door die gratie die hy in desen Ionckheere hadde, hem Governuer van den lande soude maken daeromme hebben zy raet gehouden ende ghepractiseert, hoe dat zy den Keyser met den ioncheere aen der sijde mochten brengen, geen achter dencken noch vrese hebbende wat hier namaels daer af comen mochte Ende de principaelste hier af was geheeten Gouweron een quaet verrader, ende was een van des Keysers principael Heeren van groten gheslachte, ende des Keysers secreten Raedt alzo dat de Keyser niet en dede anders dan by Gouwerons rade, doe hebben dese verraders eenen bequamen tijt gesoekt om den Keyser te doen dode oft in heydenisse ghevangen te leveren met den Ioncheere, alzo ghy hier naer hooren sult ende dat hy dan selve int regiment mochten blijven.