De Saksenspiegel in Nederland

Van den selven. XXIX. (I. 27. § 2.)

So welc man van ridders aert niet en is, an dien die toestaet ²) des heerscildes, die laet in den erve te nemene ³) so wanneer hi sterft ende gheen herwade, so wat sulkes dinghes erveloes versterft, heerwade of erve of rathe ⁴), dat sal men antworden den rechter of den vronenbode of hyt eysschet. Nadien dertichsten dage salt die rechter houden iaer ende dach onverdaen ende wachten hem of yemen ⁵) mit rechte daer toe tie. Sint keertet die rechter an sinen nut, ten si of die erfname ghevanghen si of indes rikes dienst ghevaren si buten lande of in godsdienst ⁶). So moet hi syns wachten mitter erve, want ⁷) hi en mach ⁸) an sinen erve niet verzumen die wile. Dit is gheredent van varender have, an eyghen ende an hoven mach hem die zasse ⁹) verzumen binnen XXX iaren ende iaer ende dage ende niet eer.