Reis van Jan van Mandeville


Als die keyser doot is, hoe si enen anderen kyesen, te weten synen outsten zoon ende anders. Na dien dat die keyser doot is vergaderen die vij gheslachten ende kyesen sinen zone ende
[Folio 130rb]
segghen hem aldus: wi wilcoren ende ordineren ende bidden v, dat ghi onse here zijt ende keyser ende onse couerrere. Ende hi antwoorde: wildi dat jc ouer v regnere, een yghelijc moet doen dat mi lief is, ofte int lant te bliuen of te rumene ende den ghenen, die jc segghe ende ghebiede te dodene, datmen dien staphans doden sal ende al dat jc segghe, dat dat veruolt moet sijn. Ende si antwoorden alle met eenre stemmen: wat dat ghi ghebiet, dat moet werden ghedaen. Ende daer na seit die keyser: ghi sult weten, dat myne woorde sullen voortaen snidende sijn alse zwaerden. Ende daer na so setmen op enen zwarten vilt ende also doetmen
[Folio 130va]
sitten in enen setel ende men set hem sijn crone opt houet. Ende dan alt lant sent hem prosente in dien daghe meer dan .c. kemele moghen draghen, vol van goude ende suluere sonder die juwelen van den edelen luden . . . . . ende van costeliken ghesteynte dat sonder getal es zonder ooc die paerde ende gouden lakene van purpure, van cammecate ende van tartarien, dier so vele is, dat mens niet gheprisen en can.