Reis van Jan van Mandeville

Van dat conincrijck van amazonyen, daer niet dan vrouwen en wonen of en sijn.

Daer na in gheen zide van caldeen is masonien, dat is tlant van den vrouwen, dat es een conincrike, daer niet dan vrouwen en wonen. Dat en is niet so te verstaen also sulke liede wanen, dat die manne in dit lant en souden moghen

[fol. 80va]

wonen of duren leuende, mer si en willen niet, dat die mannen hebben heerscapie bouen hem. Want bi tiden die leden sijn was een coninc in dit lant ende daer woneden ghehude mannen al so vele als elder, so dat gheuiel dat die coninc orloghe hadde ieghen die liede van sythie ende dese coninc hiet colophius ende woort met alle den edelen bloede van sinen conincrike doot gheslaghen in dien strijt met dien van sythie. Ende alse die coninghinne ende die andre edelle vrouwen hoorden die niemare, doe wapenden hem alle die vrouwen vanden lande metter coninghinne, recht als verwoede

[fol. 80vb]

wiue ende doden alle die mannen, die daer bleuen waren, want si wouden, dat alle die wyuen van haren lande weduwen waren also wel alsi. Ende sint en wouden si niet ghedoghen, dat enich man bi hem ofte onder hem ware bouen vij daghe, noch datmen enich knapelkijn kint op soude houden onder hem. Mer alsi gheselscap van mannen hebben willen, zo trecken si vte den lande tote den lande, die an haer lant palen ende hebben haer amise ende vrende, diese visenteren ende bliuen bi hem x daghe ende dan keren si weder achterwaert. Alsi kinder hebben, ist een knapelkijn so senden sijt den vader, alst can gaen ende alleen eten. Ende en heeeftet ghenen vader noch vrient, diet van

[fol. 81ra]

sinen weghen ontfaen wille, si dodent. Ende ist een meyskijn, si doen hem sine borsten ofte mammen of. Ende ist een eedel meyskijn, si doen hem of die slenker mamme omme den scilt bat te draghenne ende ist een ander meyskijn te voet, si doen hem of die rechter mamme, op dat si haer niet en lette mitten turschen boghen te scietene, want si scieten herde wel. Jn dit lant is een coninghinnen dye al dat lant regeert ende si sijn haer alle onderdanich ende altoes so maken si ene coninghinne mit kiesene. Men kiest die ghene, die vroomste is in die wapene. Dese vrouwen sijn herde goede oorlogherssen, coene ende wijs ende duechdelijc ende dienen dicwille op sout anderen heren ende comen omme gelt te winnen. Dit lant van masonien is een

[fol. 81rb]

eylant al omme gaende mit wateren zonder ten tween steden, daer twee inganghen in sijn. Ende tusschen ende omtrent dat water wonen manne, die haer amise sijn, daer si gaen solaseren ende spelen alsi willen. Bij desen lande van masonien is tlant van termogitte, dat een herde goet lant is ende luchtich. Ende om die duecht van desen lande dede die coninc alexander daer in maken een stat, die hi heten dede alexandrie, mar men heetse nv celtite ende is op dander zide van caldeen.