Reis van Jan van Mandeville

Vandes soudaens wyuen.

Die soudaen heeft iiij ghetrouwede wiue, ene kerstene ende iij sarrasijnsche, vanden welken die ene woont tote jherusalem, die ander tote damas ende die derde tot ascaloene. Si moghen hem wel verwanderen, op dat si willen, in anderen steden ende als hi wil vaert hise visenteren. Ende hi heeft also vele vriendinnen, als hi wil, want hi doet voor hem comen die scoonste ende die edelste van sinen lande ende doetse hoeden herde eerlijc ende als hi een hebben wil met hem te slapene, soe doet hise alle voor hem

[fol. 19vb]

comen ende welc hem best behaecht, die gheeft hi een vingherlinc oft werpet in haer scoet ende staphants leedtmense baden ende men palleertse ende cleetse harde rijckelijc. Ende aldus soe doet hi also dicwille alst hem lust ende des nachts so lijdt mense in sijn camer.

En gheen vreemt bode en coomt voor hem, hi en si ghecleet mit gulden lakenen ofte mit lakenen van tarterien ofte met cammecate jn deser seluer manieren dat die sarrasine ghecleet sijn. Ende also saen alsmen siet eerstwerf, ist ten venstren of elder waert, so moet men hem teraerden nighen ende die aerde cussen. Want dat is dien zede der gheenre die hem eere doen die

[fol. 20ra]

jeghen hem spreken willen. Ende also langhe als enighe vreemt man of bode jeghen hem spreect, sijn volc staet omtrent hem met blote zwaerden ende met anderen wapenen op ghehoudender armen ende wt gherect om op hem te slane, ist dat hi yet zeghet, dat den soudaen niet en ghenoeghet. Ende niement en coomt voor den soudaen, die hem yet bidt, op dat sine bede weselijc is ende niet jeghen sine wit, hine gheeft hem al dat hi hem biddende is. Ende alsoe doen oec die ander princhen in dien lande, want si segghen, dat niement en soude comen voor enighen goeden prinche, hi en soude daer of verbeetert sijn ende te bat hebben ende soude blideliker van hem sceden dan hi was, doe hi voor hem quam.