Refereynen ghepronunchieert opte intreden binnen der stede van Delft

[fol. N4r]

Gheervliet.

Refereyn op de Uraghe.

Ick die in swaerheyt ben fantaserende
Hoe ick best door die werelt soude connen raecken
Ende int fraeyste mijn zijn ghenerende
Dus ist ghemoet nemmermeer cesserende
Deur mijn ghedachte beghin ick wat te smaecken
Het waer wel tijt naer gheleertheyt te haecken
Want met arbeyt is thans weynich te winnen
Dus wil ick mijn int pracktiseren wat vermaecken
Al salt wat costen al aen mijn sinnen
Als ick het paeyement weder sal vinnen
So sal mijn den hooftsweer wel zijn vergheten
Ende ick dat ghelt steeck in mijn tassche binnen
Met gheleertheyt mach een mensche hem wel vermeten
Het schijnt de gheleertheyt is int hoochste gheseten
Daerom dunckt het mijn goet tot allen stonden
Om wel te ondersoecken alle secreten
Gheleertheyt swaer ist best doort smenschen verstant gheuonden.

Ben ick niet vast in lesen in schrijuen
En ick ben al te oudt om scholen te gaen
So wil ick gaen nae Rethoricaes camer drijuen
Ende daer in conste my gaen verstijuen
Daer hoor ick van alle saecken seer goet vermaen
Daer werden alle practijcken met conste ghedaen
Van dichten stellen ordonneren ende van als
Hadt ick ouer langhe versint ick wout om een Vaen
Maer men hoort vande luyden seer veel ghekals
Die zijn thans huyden daechs wel also vals
Dat zijt oock een offraen van alle zijden
Sy segghen wat maecken dees Redrijckers al gheschals
Wie soude dit altijt toch moghen lijden
Sy moghent niet lijen datmen hem gaet verblijden
Hoe wel dat het is om leerens oorconden
De conste moetense toch altijt benijden
Gheleertheyt swaer ist best doort smenschen verstant gheuonden.

[fol. N4v]

 

Als wy dan weder comen by eerlicke menschen

 

So moetense dan dickmaels oock swijghen stille

 

Dan salmense daer wel hooren noch wenschen

 

Om dit en om dat, maer sy moghen gaen lensen

 

Sy en sullent niet crijghen naer haeren wille

 

Dus ruyckt Rethorica soet bouen Kirmille

 

Ick moetse hanteren wat willense praten

 

Sy brengt schriftuere voort al soumense villen

 

Die waerheyt te spreecken en salse niet laeten

 

Het is oock groote dwaesheyt bouen maten

 

Die haer haten sy en zijn oock niet wijs

 

Die een vast Scholier is voor Heeren voor Staten

 

So mach hy spreken hy crijcht altijts prijs

 

Dats een verstandich man met goet bewijs

 

Hoortmen hem daer eeren met goet vermonden

 

Stelt v altijt toch nae dat bloeyende rijs

 

Gheleertheyt swaer ist best doort menschen verstant gheuonden.

 

 

 

Prince.

 

Prince Princesse edel greynken ghepresen

 

V bywesen is lieffelijcken om hooren

 

Musica v suster coemt v by midts desen

 

Haer liefelijck stemmeken met haer clinckende pesen

 

Is in mijn hert gheresen doet vreucht oorbooren

 

Ghy zijt twee bloemkens seer wtuercoren

 

Wy moghen ons niet stooren al spreecken de menschen verkeert

 

Alle scientie coemt wt v te vooren

 

Sy gaen dickwils verlooren die v niet hebben gheleert

 

Voor alle vierscharen zijt ghy gheeert

 

Door prontighe faconde die wt v spruyt

 

Ons iolijt vanden dooren hebt ghy vreucht vermeert

 

Wy drincken altsamen wt v lieffelijck canduyt

 

En Rapen gheneucht door v soet virtuyt

 

Ghy hebt ons herte in v liefde ghebonden

 

Alle constighe dienaren segghen wy ouer luyt

 

Gheleertheyt swaer ist best door smenschen verstant gheuonden.

FINIS.