Refereynen ghepronunchieert opte intreden binnen der stede van Delft
(1581)–Anoniem Refereynen ghepronunchieert opte intreden binnen der stede van Delft–
Auteursrechtvrij
[Folio K4r]
| |
Refereyn op den Reghel.Hoort alle ghy die in Godt vruchde wilt rapen
Hoe Godt den mensch heeft ingheblasen nae zijnder aert
Een leuende siele, so naer zijn beelt gheschapen
Hem daer naer wel stijf en diep doen slapen
En Heua wt hem ghemaeckt, als schriftuer verclaert
Heeft hem een wet belast, dien hy qualick heeft bewaert
Waeromme alle menschen eens moeten steruen
Dan Godt heeft zijn ghenade weder gheopenbaert
Niet willende die menschen eewich bederuen
Gaff belofte, en wet, om zijn rijck te eruen
Die smenschen kinderen haest hebben vergheten
Hoe souden sy van Godt dan grati verweruen
Willen sy niet doen dat hun wert gheheten
Van Godt, die op die Hemelen is gheseten
Hy heeft haer wel eens loon naer wercken ghegheuen
Met die Zont vloet verdroncken, so zijn toorn ghequeten
Want Godt haet den menschen die booslick leuen.
| |
Een Liedeken.Menschen wilt v bekeeren
Van sonden wie dat ghy zijt
En nieuwe herboorte leeren
Maeckt v vleys zijn lusten quijt
Daer deucht door wert benomen
Den boosen sal verdomen
Godt als die uyr sal comen
Want hy haetse altijt.
Godt liet Noë met zijn huysghesin ouerblijuen
Om t'menschelick gheslacht niet heel te vernielen
Vernieude zijn verbont, maer men sach bedrijuen
Ten tijde Abrahe veel quaets, waer door ontlijuen
Godt wilde, met den brant, menich hondert sielen
Wt vijf steden maer dry t'leuen en behielen
| |
[Folio K4v]
| |
Voort als hy Moysen tot Leytsman hadde vercoren
Abiron, ende Core Datan, hem teghen vielen
Hebben met haren aenhanck, t'leuen verloren
Sy soncken inder aerden en mosten versmoren
Merckt oock wat daer is an Aarons sonen gheschiet
Hun hielp niet van wien sy waren gheboren
Haer vreemt vyer int offer maecktese tot niet
Denckt wat plaghen Godt Israël ouercomen liet
Om dat sy met t'gulden Calf sonde bedreuen
Hy die rechtuardich is, deuchtsaem leuen ghebiet
Want Godt haet den menschen die booslick leuen.
T'moet door den gheest ghebeuren
Dat ghy hier v vleys besnijt
En soeckt ter rechter deuren
In te gaen op dat belijt
Christus v voor den Vader
Die den boosen te gader
Sal hier zijn een versmader
Want hy haetse altijt.
Sissera en Abimelech hebben vercreghen
Haer loon, die Beniamiten hebben oock niet ghemist
In Gibeon, schandaleus tot quaet gheneghen
Wast Saul, Seba, Ioab, Godt was haer al teghen
En Semei met Absolon die daer maeckte twist
Teghen zijn Vader Dauid, oock Athalias list
En moordadighen handel, thad all een quaet ende
Iesabel, Ioakim, Iae segt my eens die ist
Welcke Godt omsondighe daden niet en schende
Maer nae desen tijt is noch die meeste ellende
Dat is verdoemenis van ziel en lichame
Voor den boosen die niet en doet emende
Staende af van quaet, want t'goet is Godt anghename
Hoe dickmael Godts gheest inden Propheten quame
En verweet Israël haer sondich ancleuen
Door tonbesneden hert, dus, elcx hem t'quaet schame
Want Godt haet den menschen die booslick leuen.
Ist oogh valsch van ghesichte
So steeckt v dat wt subijt
Wandelt hier in dat lichte
Op dat den Heer v beurijt
Godt verbiet boose seden
En gheene quade leden
Moghen int rijcke treden
Want hy haetse altijt.
| |
[Folio L1r]
| |
Prince.
Princen daerom wert recht herboren deur den Gheest
Hemels ghesint, niet soeckende dan dat bouen // is
Van Godtlicker aert, en met vleyslick en weest
Wt Godt hier gheboren daer an hangt meest
Hoereerder, noch dronckaert, gheensins te louen // is
Wie eenich vleys wercken doet van Godt verschouen // is
Die Heere heeft zijn lust in een suyuer ghemoet
Dus wie Godts rijck bemint, daert goet om houen // is
Siet toe dat hy den wille des Vaders hier doet
Vergramt hem niet, maer honghert naer die waerheyt soet
Een reyn suyuer herte so moet hy draeghen
Alle twist waer hy kan by hem werden gheboet
En arm van gheest zijn, sal hy Godt behaeghen
Met barmherticheyt bevanghen alle zijn daeghen
Om in Gods rijcke te werden verheuen
Midts Godt dan sal ontkennen die naer boosheyt iaeghen
Want Godt haet den menschen, die booslick leuen.
Prince.
Princelick als Campioenen
Doot, Duyuel, noch Hel en mijt
Denckt hoe Christus versoenen
Ons most deur een sware strijt
Dus wilt die sonden haeten
Godt sal v niet verlaten
Maer wel comen te baten
Want hy haetse altijt.
Ansiet die Ionckheyt. |
|