Refereynen ghepronunchieert opte intreden binnen der stede van Delft
(1581)–Anoniem Refereynen ghepronunchieert opte intreden binnen der stede van Delft–
Auteursrechtvrij
[Folio E3r]
| |
Hier ontfangt Rhetorica de Camer van Gheervliet.
Ga naar margenoot+So verblijt die van Samarien met hoopen // waren,
Doen de vijf Melaetsche alsulcke tijdinghe brochten:
Dat der Philistenen tenten leech en oopen // waren,
Iae d'een metten anderen tsamen verloopen // waren,
Die den hongher so bitter in Samarien wrochten:
Also verblijt als sy doen ter tijt wesen mochten,
So zijn wy nu met v, die vanden dorren alhier,
Die tIolijt vanden dorren mee altijt sochten,
Om rustelick te leuen ende goedertier,
Wy begeeren verhaelt ons nu met een goede manier,
T'lustich bewijs van die hier voorhanden // zijn
Om dat bouen conste gheen dinck gaet so lustich noch fier,
Want const verchiert huysen, tempels, steden en landen // fijn.
| |
T'bewijs opten Intrede vande Camer van Gheervliet.UVy Iolijtsche sinnen die v besoecken hier
Ghy Raepkens gheneucht naer v begheeren soet
Om ons te presenteeren in dit quartier
In goeder manier so comen wy metter spoet
Om v te groeten met een liefflicken groet
In ons habitatie alst claer is ghebleecken
Ende v te obedieeren met een goeden moet.
Hoe dat die suyuerheyt vroet niemandt heeft besweecken
Die suyuerheyt was van Ioseph oock niet gheweecken
Als Putijphars vrouwe Oncuysheyt wilde begheeren
T'welck Ioseph int harte swaerlijck heeft ghesteecken
Laet vluchtende zijn mantel by haer sonder cesseeren
Tcleet des suyuerheyts doet den mensche veel eeren.
| |
[Folio E3v]
| |
Suuerheyt te hanteeren is Godts behaghen wel
Suyuerheyt brocht oock wt versaghen fel
Susanna die de oude der quaden belooghen
Die welcke door haer schoonheyt hadden behaghen snel
Om haer te schoffijeren met grooten ghequel
En vielen rebel Daniel naer Godts vermooghen
Heeft gheroepen met luyder stemmen vertooghen
Ick ben ontschuldich van dit onnoosel bloet onbesmet
Sy draghen v voorwaer groote valsheyt voor ooghen
Ende hebben v bedrooghen met woorden net
Keert weder ten oordeel doet recht nae de Wet
God verlostse altijt die hem laten leeren
Tcleet des suyuerheyts doet den mensche veel eeren.
Rhetorica die edel schoone figure reyn
Heeft oock certeyn die suyuerheyt gheopenbaert
En heeft die schrifture int Nederlandtsche pleyn
Als een fierlijcken greyn seer wel verclaert
Hierom ghy diese bemint ende mit haer paert
Wilt v doch totter suyuerheyt nu begheuen
Laet varen gulsicheyt eer ghy beswaert
Tast aen die Kaert der suyuerheyt verheuen
Op dat ghy v Euen, broeder hier in dit leuen
Gheen arghenis en doet, wilt suyuerheyt vermeeren
Tot Mattheus achtien staet het beschreuen
Wee hem die arghernisse doet, maer wilt keeren
Tcleer des des suyuerheyts doet den mensche veel eeren.
Prince.
Princelicke Prince, als v alder page
Comen wy ons presenteeren, mit demoedighe courage
Ons habitage is oncostelick O fiere ieucht
Want het ons, en sal costen yet, sonder kijffage
En tiolijt vanden dorren, begheert gheen gage
Maer slechts te vertoonen mit goede gheneucht
Ons bewijs Reden brenghende mit alle vreucht
Wilt toch nu wel aenmercken, slaet acht op die saecken
Soo wijt oock hebben ghebesicht, met goeder deucht
Tsal weder op zijn oude plaetse, seer wel gheraecken
Dan het gheschiet nu tot een soet vermaecken
Ons bloem is den dorren boem, tot consts vermeeren
T'cleet des suyuerheyts doet den mensche veel eeren.
|