Refereynen ghepronunchieert opte intreden binnen der stede van Delft

[fol. C1r]

Hier ontfangt Rhetorica de Camer van Monster.

SCRIPTVRA
1581
PLVTARCHVS
SALLVSTIVS
CICERO
VERGILIVS
ARISTOTELES
RETORICA

⁺Nae dat Sennacherib dien vromen hanse // zeer
Ierusalem benaude en meendet te beeruen:
En so God in eender nacht versloech dat gantsche // heer
Dat ghemeent hadde andere te verderuen
So verblijt als nv waren die daer dochten te steruen
En Smaecte sdruyfs soeticheyt sonder ghequel:
So verblijt zijn wy, nv wy v Rancxkens verweruen
Met uwer comste alhier, deur een gunstich opstel
Mer wilt ons nv verhalen met woorden snel
Den sin uws voornemens die wy met vreuchden // eeren
Al en schijntet haer som niet dan te wesen spel
Ist Schriftuyr of Poësie het comt seer wel
Men mach God wel met vreuchden in deuchden // eeren.

+ 4. Reg. 19.

[fol. C1v]

Bewijs op den Intrede vande Camere gheintituleert, Smaect Sdruyfs soetheyt, binnen Monster.

Ghelijck de Philist een soo al by Abrahams tijden
En Isaacx, soo daer nae oyt gheweldich en stout
Met een valsch hert en eyghensoeckelick benijden
Hun onderstonden te stoppen sonder vermijden
En met aerde te vervuylen onuerflout
De Fonteynaderen des zuyueren waters cout
Die by Abraham en Isaac theurder lauen
En heuren naecomers inden Lande menichfout
Ghevonden waren ghebout en ghegrauen
Waer deur sy sochten dat dees als slauen
Hun dienen souden, oft haer verliesen
Wten landen vluchtich, en laeten haer hauen
Twas bitter van twee quaen een te moeten kiesen.

Soo hebben wy beuonden in onsen daghen
En onser voorouderen dat der tijden Philisteen
Meer aertsch ghesint dan hebbende behaghen
In die Leuende Fonteynaderen, tallen vlaghen
De selue verualst hebben met aerde ghemeen
Deuangelische Leere ghetrocken alleen
Ten dienste van haer houaert, ghewin, en tyranny
Dies als Izaac oft van zijner afcomste een
Een reyn ader vondt d'oprechte leere hadt bly
Dien worde wedersproken, veriaecht onury
En dat die ader haer ghewin niet zou schaden // dan
Most terstont ghestopt zijn mit valsch wtlegghingh daer by
Siet waer toe ghiericheyt smenschen hert raden // can?

Alst nu mitten Philisteen so veer was ghecomen
Dat inde plaetse van der Fonteynen claer
Haer vuyl slickich water ter werelt word' opghenomen
En dat als in Israël alleen hier noch veele vromen
Nae der reyne Fonteyne trachteden hier en daer
Soo hadden sy ouer ons ghebracht alsulken vaer
Van wapenen, dreygende met gheweldigher handt
Der Fonteynen ons te berouen, te maecken dienstbaer
Mer Godt die als zijnen vromen knecht Dauid sandt
Heeft ons verlost ghenadich wt dien ellendighen standt
Den stouten Goliath thooft afgheslaghen // fel

[fol. C2r]

 

Sulcx dat nu vry bloeyen de Fonteynen aen elcken cant

 

Dies hem elck lof en prijs mach toedraghen // wel.

 

 

 

Op dat dan Prince sulck weldaet mocht bekent // staen

 

Ouer al, en Godt daer van ghelooft werden wt minnen

 

So bringhen wy ter ghedachtenisse hier present // plaen

 

Goliaths hooft soot van Dauid is afghewent // saen

 

Als in een triumphe te Ierusalem binnen

 

Waer by dat elck vermaent worde in zijne sinnen

 

Zijner wonderlicker verlossinghe wijt vermeert

 

Dies tot meerder teycken laten haer hier oock vinnen

 

Byder Fonteynen vooren gheallegoriseert

 

Schriftuere en die neffens hem oprecht leert

 

Onuerhindert in haer dienst tot elcken gheveucht

 

Dies wy Wijnranxkens dat elck daer toe oock werd ghemoueert

 

Om Gode te louen hier rapen gheneucht.