Der IX quaesten

¶Vanden wreeden tyrant Keyser Nero

[fol. C2v]

Een machtich prince was Nero, ende keyser van Rome, een wreet tyrant, die grote onmenschelijcke tyrannien dede. Hi vervolchde seer die kerstenen ende hi maecte veel martelaren. Die heydensche meester Seneca was gheweest die schoelmeester van keyser Nero in sijnder ioncheyt, des hy hem qualijc gheloont hadde na sijn mogenticheyt. Ende als hy een tijt keyser geweest was so quam bi hem sijn schoolmeester Seneca, ende hi begeerde wat van hem voor sijnen loon. Waerom dat Nero gram wert ende hem noch ontsiende, seyde Ic sal v dijnen loon geuen. ende kiest an wat boom ghi hangen wilt, dat sal v gebueren voor uwen loon. Doe seyde Seneca, o heer keyser, waer hebbic dat verdient. Doe gheboodt Nero een van sinen dienaers ende seyde Neemt een bloot sweert en hout dat bouen sijn hooft hem dreyghende daer met te slaen ende als ic segge slaet, so slaet hem doot. Ende als Seneca dat sweert sach, so nicte hi metten hoofde ende ontvloet dat sweert. Doe seyde Nero, meester, waerom doet ghi dat Doe sey Seneca O heer keyser, ic ben een mensche daerom vreesic die doot, ic sie dat blote sweert bouen mijn hooft. Doe seye Nero So ontsie ick v ooc als ic v sie, om dat ghi mijn meester sijt geweest in mijn ioncheyt. Doe seyde Seneca. Laet my leuen ic sal vertrecken in een ander landt dat ghy niet meer van mi verhoren sult. Neen seyde Nero, so langhe als ic v leuende weet, so en soudic nemmermeer ruste hebben, noch der vreesen quijt sijn, dairom moti steruen. dus kiest geringe wat doot ghi wilt. Doe liet Seneca maken een warm bat daer hi in ghinck sitten, ende hy deden laten an beyde sijn armen, ende hi bloede so lange

[fol. C3r]

dat hi sterf. ende daerom behielt hy den naem van Seneca. dat is, hem seluen dodende, omdat hi zijns selfs doot verkoes

¶Op een gheuielt dat die keyser nero ghinc met sinen heren voor by een huys daer die vrouwe in arbeit ginck, die seer steenden van pijnen, so dattet de Keyser. Nero hoorde, so vraechde hi sinen volc wat daer te doen was, so wort hem gheantwoort dat daer een vrouwe was die in arbeyt van kinde was ende die een kint ter werelt soude brengen, waer om hi doe te huys ghinc ende hi ontboet sijn moeder, ende die dede hi op snijden haren lichaem ende hi wilde sien waer hi ghelegen hadde. O felle onnatuerlijcke boesheyt, o wrede tiranscap, o onnatuerlijck hert die so deerlijc liet verderuen dat vat daer hi sijn leuen in ontfangen had

¶Op een tijt dairna so ontboodt hi veel meesters in medecijnen, en seyde dat si hem souden doen een kint dragen, oft si souden al moeten steruen. Alst dit die meesters hoorden waren si veruaert, ende ghingen te rade ende si gauen hem eenen dranck daer hem eenen worm af int lijf wies so dat hem sinen buick bestont te heffen ende groot te werden, also dat hi grote pijne in zijn lijf ghecreech. Doen ontboodt hi weder die meesters, ende seyde. Maect mi dit kint quijt, ende dat ict ter werelt brenge. Doe gauen hem die meesters eenen dranck dat hem die worm af ginck die seer leelijc, ende vreeslijc was Als hem Nero sach, so vraechde hi den meesters waer om dat sijn kint so vreeslijc ware. Doen seyden die meesters Om dat ghi dat kint niet voldragen en hebt Doen liet hi sijn kint besluten, ende op voeden met melck.

¶ Op een tijt begheerde hi een schoon vyer te sien, so dede hi romen aen alle hoecken ontste-

[fol. C3v]

ken in brande, ende hi liet die stadt barnen .vii. dagen ende .vii. nachten lanck, ende daer quamen veel mannen ridders knechten die dat vier wilden blusschen die liet hi alte samen int vier worpen, ende verbarren ende so dode hi menigen man. Dit siende de Romeynen, en conden dit groot quaet niet langer gelijden, so vergaerden si met macht, ende si waren geheel gram op hem, so dat si hem namen ende brochten hem met ghewelt wter stadt. Als nv Nero sach dat hi niet ontcomen mochte so nam hi eenen staeck en den maecti scherp metten tanden, ende sette den staeck op zijn burst, ende viel daer in ende dode hem seluen. Ende de duuels namen sijn siel ende vervuerdense in eenen nootboom die an de porte stont daer dat volck wt ende in ghinck. Ende op den boom saten dagelijcx veel rauen die den menschen veel quaets deden als si door de poorte ghingen wt oft in, ende niemant en wiste die sake waerom. Doe wert den paus geopenbaert dat die rauen al duuelts waren, ende dat si daer bewaerden de siele vanden keyser Nero. Doe dede die paus den boom afhouwen, ende op die plaetse wert gemaect een kercke, die daer noch staet, ende is geheten Sancta maria de populo. Aldus comen quade wercken tot quaden loon. daer ons Ihesus af beschermen wille door sijn barmherticheyt. Amen