Der IX quaesten

¶Hoe de coninc. van Sirien brieuen sandt tot Achab. ende hoe hi grote menichte vergaderde om te strijden teghen Achab.

Corts hier na vergarderde Benadap coninc van sijrien een groot heyr. ende .xxxii coninghen. veel wagens en rosvolck, ende quam beuechten samarien dat hi gewant Ende sende doe boden tot Achab den coninc van Israhel seggende Dit seyt die coninc. Benadap Dijn siluer dijn, gout, dijn huysvrouwen, dijn kinder. dit is al mijn Doe antwoorde Achab die coninc van Israhel, Na v woort heer coninc, so ist al v, ic, en al dat ic hebbe Doe liet hem wederseggen die coninc Benadap Morgen sal ic senden mijn dienaers, ende si sullen besoecken v huys ende die huysen van uwen knechten, ende al dat hem behaecht sullen si met hem nemen Doe seyde Achab dit en mach ick

[fol. B3r]

niet laten doen Dit wert Benadap gebootscap Ende hi sat, ende maecte goet chier met den coningen die hem te hulpen waren comen, ende, Achab quam met dat volck van Israhel, ende sy versloegen die Sijrien. ende verjaechden de coninc met sijn hulpers Int iaer daer na so vergaderde die coninc. Benadap van syrien een groet heyr tegen Israhel, ende die here gaf die syrien in die handen van Israhel ende die coninc Achab versloech van die syrien hondert duyzent voetvolck op eenen dach Ende die coninc Benadap vloet met zijn ander volc in die stadt Affet, ende die muren vielen neder op dat volc datter geuloeden was .xxvii.m. menschen, maer die coninc Benadap vloet in die stadt, ende liep in sijn slaepcamer Ende die heren vanden coninc Benadap, namen sacken om haer lenden, ende corden om hoofden ende quamen ootmodelijc totten coninc Achab van Israhel ende baden om des conincs leuen Ende Achab nam den coninc van Syrien in sijn gracie, ende si scheyde van malcanderen met enen payselijc tractate datter gemaect was van den coninc van Syrien Doen quam een propheet tot Achab seggende Dit seit de heer. want ghi enen man hebt laten gaen die den doot verdient hadde, daer om sal v leuen sijn voor sijn leuen, ende v volck voor sijn volck Ende die coninc Achab versmadende te horen die worden, quam seer verweet ende verstoort weder in sijn huys in Samarien Daer was een prince in des conincs hof Naboth geheten die eenen schoenen wingaert hadde by des conincs huys Ende die coninc seyde tot Naboth, laet mi ouer uwen wijngaert, ic sal v daer voor gheuen siluer oft een anderen wingaert. Ende Naboth en wilde dat niet doen, waerom dat Achab te bedde ginc liggen, ende hi keerde sijn aensicht in die want, ende hi en wilde

[fol. B3v]

eeten noch drincken. Dit siende zijn wijf Iesabel vraechde wat hem was, Doe seyde hi. Naboth heeft my geweyghert sinen wijngaert te vercopen. Doe dede Iesabel Naboth doden, ende quam doe weder bi Achab ende seide Staet op en eet en drinct, ende neemt den wijngaert na v want naboth is doot. Doe dit Achab hoorde, besat hi den wijngaert Daer na quam tot hem Helias seggende Dit seyt die here. daer die honden hebben ghelect dat bloet van naboth daer sullen si lecken v bloet. ende om dat ghi den here verwect hebt op v, ende hebt v volc doen sondigen so sal ic doden al dat manlijc geslacht van Achab. en sal v huys afnemen, als gedaen is dat huys van Iheroboan. En die honden sullen eeten dat lichaem van Iesabel. Ende sterfdi in die stadt so sullen v die honden eeten, en sterfdi int velt so sullen v die vogelen eeten om dat ghi dootslach ghedaen hebt om eens anders goet, en hebt dat beseten. Ende daer was gheen dye so veel quaets dede inden ogen gods als Achab. Ende als hi gehoort had die woorden van helias schuerde hi zij clederen, en track an een haren cleet ende vaste, ende sliep op eenen sack Doe sey die here tot helias, want hem de coninc. tegen mi heeft verootmoedicht soe en sal ic gheen quaet op hem senden in sinen dagen mer inden dagen van sinen sone sal ick dat quaet senden op sijn huys. Dair na quam coninc. achab te stride met coninc. Iosaphat ende Achab stont op sinen wagen om vechten teghen die Syrien, en daer schoot een vanden syrien ende quetste den coninc seer, ende hi sterf teghen den auont. Ende hi wert gebracht in Samarien, ende dat bloet liep wten wonden door den wagen, ende die honden lecten dat bloet so hem geseyt was. ende wert begrauen in Samarien.