¶Prologhe
Om dat elck mensche te meer begheren soude te volghen die duechden ende laten die boesheyt, ende om datmen hebben soude te meer liefden tot god ende caritate tot sinen eeuen mensche, so heb gheordineert te spreken van die ix. quaetsten, om dat elc te williger soude volgen dat woort vanden heydensche meester Seneca dye daer seyt. Al wist ick dattet die goden vergheuen souden, ende dattet die menschen niet weten en souden, nochtans en soudick niet willen sondighen om die leelijcheyt der sonden. Och brueders heeft dit ghedaen een heydens man die gheen hope en hadde vanden rijcke gods. hoe veel te meer souden wij die duechden volgen om te vercrighen die beloften Chrysti Ihesu. Ende oock die duechdelijc leeft crijcht een duechdelijc eynde, ende die quade een quaet eynde. want het is een ghemeyn segghen, qualijck leeft qualijc sterft. ghelijc dat hier wel blijct van desen .ix. quaetste, dye in groot quaet doen leefden, sijn oock onsalichlijck ghestoruen. Als Caym wert onuersiens doot gheschoten int velt. Ieroboan sterf vanden plaghe des heeren. Achab wert doot gheschoten in een strijdt. Ioram verrotte zij darmen in sinen buyck ende sterf. Iudas verhinck hem selfs. Nero sterf onsalichlijck. Pilatus dode hem seluen. Iulianus apostota wert onuersienlijc van eenen witten ridder doorsteken in in een belegghe Dus o mij brueders arbeyt in duechden ende laet dat quaet. want den loon des arbeyts valt suet int eynde.
Auteursrechtvrij