Noordnederlandse Historiebijbel

[14]

Doe Thobias dus gebenedijt ende groet gemaect had sinen God, doe levede hi altoes voirt onder die vrese Gods. Ende nadien dat hi weder siende wort, so leefde hi 42 jaer. Ende hi sach sijns kints kinderen ende daerna haer kinderen. Doe hi 56 jaer out was, doe wort hi blint. Ende doe hi 60 jaer out was, doe wort hi weder siende ende leefde voert in blijscappen ende toecomende in doechden onder die vrese Gods. Doe Thobias out was 100 ende 2 jaer, doe vernam hi dattet sijn sterfdach naecte.

Doe riep hi tot hem sijn soen ende sijn soens kinderen. Doe seide hi tot hem: "Hoer, soen ende uwen sonen: die val van Nynyve is bi, want dat woert Gods en blijft niet after. U broederen die gestroeyt sijn van den lande van Ysrahel,

[fol. 205va]

die sellen noch wederkeren. Ende al haer woest lant sel vervolt worden. Ende dat huys Gods dat verbarnt was, dat sel weder gesticht worden. Ende darwaert sellen wederkeren alle diegene die Gode ontsien. Ende oec ongelovich volc sellen die afgoden laten ende sellen te Jherusalem comen ende daerin wonen. Ende alle die coningen van der aerden sellen hem daerin verbliden ende anbeden die coninc van Ysrahel. Ende ic segge u, mijn kinder, hoert uwen vader; dient God den Heer in vresen ende in der waerheit ende pijnt u in alre tijt te doen dat God behagelic is. Ende gebiet uwe kinderen voert dat si gerechticheit doen ende aelmissen geven, ende dat si Gods gedenken ende Hem gebenedien in allen tiden in der waerheit ende mit allen crachten. Nu kinder, hoert mi voert. Als gi u moeder bi mi begraven hebt, soe en wilt hier niet bliven. Mer bereet u van hene te varen, want ic sie: deser stat boesheit sel haer een eynde geven."

Doe Thobias dus sijn soen ende sijn soens kinderen geleert hadde, corts daerna doe starf hi. Ende Thobias groef sijn vader in die stat van Ny\nyve

[fol. 205vb]

ende bleef een tijt daer wonende mit sijn moeder. Ende doe sijn moeder doot was, doe begroef hise bi sinen vader. Ende hi bescicte sijn dingen na dat gebot sijns vaders. Ende hi toech uut Nynyve mit sinen wive, mit sinen kinderen ende mit sijn kinder kinderen ende toech tot sinen sweer ende tot sinen sweger ende vantse gesont in gueder ouden. Ende Raguel ontfinc sijn kinder ende sijn kinder kinder vriendelic ende leefde in gueder ouden, sodat hi sach sijn kinder kinder tot den vijften geslacht. Ende doe hi geleeft hadde onder die vrese Gods, doe starf hi doe hi out was 99 jaer. Ende Thobias loec hem sijn ogen ende begroef hem. Ende daerna starf Anna, sijn sweger, ende hi begroefse bi Raguel, haren man. Ende Thobias behielt alle die erfnis van Raguels huys. Ende hi ende sijn nacomelinge ende alle sijn maechscap die bleven in gueden leven, sodat si Gode ontfanclic waren ende storven heylichlic.

God si geloeft.

Explicit Thobias.

Hoc opus exegi, Cristo sit gloria Regi.

Hierna volget Godolyas.

[fol. 206ra]