Noordnederlandse Historiebijbel

Vijf capittel

Onder den coninc van Syrien daer was een eerbaer, machtich man, genoemt Naaman, ende was een prinse der ridderen. Ende hi was seer rijc, mer hi was malaets. Ende die van Syrien die hadden eenen jongen maecht gevangen uut Ysrahel ende die diende mit Naamans vrouwe. Doe seide die maecht tot haer vrouwe: "Waer mijn heer Naaman bi den propheet die in Samarien is, hi soude volmaectelic gesont worden van sijnre lazarien."

Doe seidet die vrouwe tot haren heer Naaman. Ende Naaman ghinc voert totten coninc ende seide hem al wat sijn dienstmaecht geseit hadde. Doe seide die coninc van Syryen: "Trect in Samarien. Ic sel enen brief an den coninc senden, dat hi u hulpelic sel wesen." Doe bereide hem Naaman ende toech te Samarien waert ende nam mit hem 10 talenten sulvers, 6.000 goude penninghen ende 10 manyer van clederen. Ende doe die coninc van Ysrahel dien brief las, doe stont daerin gescreven: "Here coninc, weet dat ic u sende Naaman, minen knecht, omdat gi hem gesont sout maken van sijnre lazarie." Doe dat die coninc verstont, doe scoerde hi sijn cleder ende seide: "Ben ic

[fol. 178rb]

nu God dat ic mach doden ende levende maken? Die coninc van Syryen sent dese man tot mi, dat ic hem soude gesont maken van sijnre lazarien. Besiet, wat saec soect hi jegen mi?"

Doe dat Helyzeus vernam dat die coninc sijn cleder scoerde, doe sende hi totten coninc ende dede hem vragen waerom dat hi sijn cleder scoerde ende seide: "Laet die man tot mi comen, opdat hi weten mach dat die propheet Gods is in Ysrahel." Doe sende die coninc Naaman tot den propheet Helyseum. Ende Naaman reet mit paerden ende mit wagenen voir des propheten huys. Doe dat Helyseus vernam, doe sende hi een bode tot Naaman. Die seide tot hem: "Gaet ende wast u sevenwerven in der Jordanen. Gi selt gesont ende gereynicht worden."

Doe was Naaman toornich ende seide: "Ic waende dat die man tot mi comen soude ende soude die naem sijns Gods angeropen hebben ende soude mijn sericheit mit sinen handen angetast hebben ende soude mi also gesont gemaect hebben. Sijn daer niet beter wateren in onsen lande, als Abana ende Pharphar? Ic mocht mi daerin gedwogen hebben." Doe keerde hi hem onwaerdeliken omme ende

[fol. 178va]

woude gaen. Doe seiden sijn knechten tot hem: "Vader, hadde die propheet een groet dinc tot u geseit, gi soutet gedaen hebben. Ende nu seit hi een cleyn dinc: Dwaet u ende gi selt gesuvert wesen." Doe ghinc Naaman ende dwoech hem sevenwarven na der propheten woerden in der Jordanen. Ende doe wort hi gesuvert van sijnre lazarien. Ende sijn vleis was reyn gelijc een jonc kints vleis.

Doe ghinc Naaman weder totten propheet mit al sijn gesin ende stont voir hem ende seide: "Nu weet ic voirwaer, datter geen God en is in alder werelt dan die God van Ysrahel. Doe seide hi totten propheet: "Ic bid u: neemt dese giften van uwen knecht." Doe seide Helyseus: "Leeft God in wes jegenwoerdicheit ic sta, so en sal ic niet van u nemen, want ic en heb dat werc niet gewrocht, mer God." Doe seide Naaman: "Ic bid u: laet mi u knechten geven dat guet dat die mulen geladen hebben, opdat si uwen God offer daerof mogen doen ende voir mi bidden."

Doe seide Helyzeus tot Naaman: "Geeft niet ende gaet in vreden." Doe reysde Naaman thuyswaert. Doe seide Gyesy: "Mijn meester laet Naaman van hem gaen ende hi en nemt niet van hem. Ic sel hem nalopen

[fol. 178vb]

ende laten mi wat geven." Ende Gyesy die vervolchde Naaman. Doe Naaman hem sach nalopen, doe ghinc hi van sinen wagen ende ghinc yegen Gyesy ende seide: "Is daer enich hinder van ons gesciet?" Gyesy seide: "Neent, mer mijn heer sent mi tot u. Hem sijn twee jongelingen overghecomen van Effraym. Geeft hem enen talent sulvers ende twee clederen." Doe seide Naaman: "Het is beter dat gi twe talent sulvers neemt." Ende Naaman deden 2 talent sulvers ende twee paer clederen doen in twee sacken ende twee knechten mit Gyesy gaen diese voir hem drogen. Ende doe si in die stede quamen, doe nam Gyesy dat guet ende verbarcht in een huys ende liet die mannen wederommegaen.

Ende Gyesy stont des avonts voir sinen here. Doe seide Helyzeus: "Gyesy, waen coem gi?" Doe seide Gyesy: "Here, u knecht en heeft nyewaert geweest." Doe seide Helyzeus: "Was mijn hert daer niet tegenwoerdich doe Naaman van sinen wagen ghinc ende quam u tegemoet? Ende gi hebt van hem genomen sulver ende cleder, omdat gi copen wilt olijfbomen, wijngaerden, scapen, ossen. Ende gi wilt knapen ende maechden houden. Mer die malaetscheit van Naaman die sel op u comen ende op u geslacht." Ende Gyesy die wort besmit mit een witter lazarie.

Scolastica seit: Alle die geestelike guet vercopen

[fol. 179ra]

ende daer yet of nemen, die sijn siec ende lazarus an der zielen ende sijn genoemt gyesiten.