Noordnederlandse Historiebijbel

8 capittel

Doe coninc Salomon den tempel volmaect hadde na die begheerte sijns vaders, doe dede hi vergaderen alle die princen in Jherusalem, die heren, die outste van Ysrahel, omdat hi die arke Gods woude halen van den berch Syon, daerse David geset hadde. Ende hi woudse setten in den tempel Gods. Doe ghinc coninc Salomon mit den priesteren die van Moyses ende van Aaron gecomen waren, ende mede mit al den levyten die van Levy gecomen waren, ende mit den princen ende heren ende mit den gemenen volc, ende haelden die arck ende die juwelen die daertoe behoerden, die Moyses hadde doen maken, als dat scrien daer men die cruden ende specien ende wieroec ende tymyama in dede. Dat scrien dat wort geset in Sancta sanctorum, want al dat daerin was, besicht men voir der arken. Oec brochten die levyten

[fol. 156vb]

dat coperen outaer mit den coperen roester, daer men die sacrificie op dede, ende alle die vaten ende reescap die daertoe was. Oec brochten si dat outaer daer men op offerde. Ende die priesteren namen die arke ende drogen die. Ende die arcke ende die ander outaren hadde Moyses doen maken mit grendelen ende mit ringen, datse die levyten dregen mochten, gelijc dat voir, in Levitico, bescreven staet. Ende doe ghingen die priesteren ende die levyten mit sanghe, mit trompetten, mit harpen, mit bongen ende ander snaerspul, ende brochten die arck in den tempel. Ende in Sancta sanctorum en most nyement ingaen dan die priesteren ende die setteden die arck midden in Sancta sanctorum onder die vlogelen van die twee cherubin. Ende alle die gulden vaten die setteden si daerin, alst geordiniert was. Ende doe setteden die levyten dat coperen outaer, daert geordiniert was. Ende si scicten alle die reescap, potten, pannen, tangen ende ander reesscap, daer men mede stoecte ende die assche uutdroech van der sacrificien in een heilighe stede die daertoe geordiniert was. Doe setteden die levyten dat outaer op sijn stede, daer men die offerhande op leide. Ende doe ordineerden si die watervaten in den tempel, daer die priesteren ende die levyten hem uut dwogen, als si tot den dienst Gods ghinghen.

[fol. 157ra]

Ende in der arcken was in die twee stenen tafelen daer God die 10 geboden in gescreven hadde. Ende daer was in dat boec Deutronomium, dat Moyses screef van der wet. Ende daer was in manna, hemels broet. Ende oec was daerin Aarons roede. Ende doe alle dingen geset waren alst behoerde, doe offerde coninc Salomon voel offerhanden der sacrificien. Ende doe bereiden die priesteren die sacrifici. Ende doe offerden die heren ende dat gemeen volc elc na haren staet. Ende si dancten ende loefden Gode mit sanghe, mit organen, mit basunen, mit bongen, mit pipen, mit sanctorien, mit herpen ende mit alrehande snaerspul. Ende die vroechde was so groet, dat geluyt was so menichvoudich, dat men dat niet volscriven en mach.

Doe quam daer een wolken gelijc enen mist ende bedecte den tempel, sodat die priesteren ende levyten ende al dat volc uut den tempel ghinc, want die glorie Gods was daer in die wolken.

Doe seide Salomon: "God, die Heer, heeft geseit dat Hi woent in die wolken. Here, ic hebbe U gemaect een huys in te wonen. Ic bidde U, Here, vesticht dat in der ewicheit." Doe keerde hem Salomon omme tot den volc ende troestede die ende seide: "Ghebenedijt God van Ysrahel, die tot minen vader sprac ende seide: `Van dien dage dat Ic mijn volc uut Egipten lede, so

[fol. 157rb]

en hebbe Ic gene stede vercoren, noch nyemant uut den geslacht van Ysrahel die Mi een huys soude maken daer minen naem in soude wesen. Mer Ic vercoes David ende settede hem over mijn volc van Ysrahel.' Doe woude David, mijn vader, God een huys maken. Doe seide God tot hem: `Gi denct in uwer herten dat gi in minen naem een huys wilt maken. Gi doet wel dat gi dat denct, mer gi en selt My geen huys maken. Mer gi selt enen soen laten; die sel u rijc na u besitten; die sel My een huys maken.' Ende nu heeft God die woerden volbrocht ende heeft mi geset op die stoel mijns vaders ende here geset over al Ysrahel, als Hi geseit hevet. Ende nu heb ic God dat huys gemaect. Ende ic hebbe daer die arke des vreden in geset."

Doe ghinc Salomon staen voir dat outaer Gods ende verhief sijn handen tot den hemel ende seide: "Here, God van Ysrahel, daer en is anders geen God in den hemel noch in der aerden dan Gi. Gi geeft vrede ende ontfermherticheit uwen knechten die in uwen wech wanderen ende uwe wet houden mit alre herten. Here God, ten is niet begripeliken dat God soude wonen op der aerden mit den menschen, want alle die hemelen en

[fol. 157va]

mogen Hem niet begripen. Hoe soude Hi dan in dit huys wonen dat ic gemaect hebbe? Mer daertoe ist gemaect, dat Gi u ogen keren selt op dengenen die U in desen huse aenbeden. Daerom bid ic U, Here God, verhoert dat gebet uwes volcs die U hier anbeden ende keert u ogen op dit huys dach ende nacht. Ende ist dat yement sondicht jegen sinen evenmensche, of sweert, of versweert, ende comen si in desen huse ende aenbeden U, hoert dat in den hemel. Ende doet oerdel over uwen knechten. Verdoemt den quaden om hare quaetheit. Ende den rechtvaerdigen doet na sijn rechtvaerdicheit. Ende waert dat dat volc van Ysrahel weken voir haer vianden, omdat si jegen U ghesondicht hadden ende doen si penitencie ende belien uwen naem ende comen si in dit huys ende aenbeden U, hoert hem in den hemel ende vergeeft hem hare sonden ende laetse mit vreden int lant wonen dat Gi haer voervaderen gegeven hebt. Ist dat den hemel gesloten is ende niet en regent overmits der menschen sonden willen, ende aenbeden si U in deser steden, ende doen si penitencie in uwen naem voer haer sonden, ende keren si hem van

[fol. 157vb]

sonden, verhoert die in den hemel ende vergeeft haer haer sonden. Ende openbaert hem enen gueden wech daer si in wanderen mogen. Waert dat daer duertijt, of honger, of pestilencie, of quade lucht, of gevenijnde dieren, of dat si van haren vianden belegen worden, of dat si in siecten quamen, ende ist dat si hier in desen huse quamen ende haer handen ten hemel reycten ende U anbeden, verhoertse in den hemel ende aensietse. Ende doet een ygelic, na dat Gi sijn herte ansiet, want Gi kent alleen die herten der menschen. Ende of hier een vreemt mensche comt uut verren lande die van den geslachte van Ysrahel niet en is ende hi hoert van uwen groten naem ende van uwer groter moghentheit ende comt hier in deser steden ende aenbeet U, verhoert hem in den hemel ende doet dat die vreemde mensche begheert, opdat hi dat volc van sinen lande uwen naem mach openbaren, opdat si U ontsien mogen ende gelijc die kinder van Ysrahel. Ende ist dat u volc te stride sel varen jegen haren vianden ende aenbeden si U in den wech ende sien si na dat huys dat ic in uwen naem gemaect hebbe, hoert haer bidden in den hemel ende doet hem na haer rechtvaerdicheit. Ende ist dat yement jegens U

[fol. 158ra]

misdoet ende die somme en misdoet niet, ende Gi laetse haer vianden vangen in verren lande of nabi, ende doen si penitencie in haerre herten in dier steden daer si gevangen sijn ende keren si hem totten huse waert ende bidden si U in der vangenisse an ende seggen: `Wi hebben gesondicht. Wi hebben quaet gedaen ende die doechden aftergelaten,' verhoertse in den hemel ende doet hem ontfermherticheit ende vergeeft hem haer sonden, want Gi sijt mijn Here, mijn God. Ic bidde U, slaet u ogen op dit huys ende verhoert mit uwen oren wat U tot deser steden gebeden wort.

Nu, mijn Heer, mijn God, staet op in uwer rusten ende weest in die arke uwer stercheit. Och, Here God, doet uwen priesteren salicheit an ende verblijt uwen heiligen dienren mit guede. Mijn Here, mijn God, en keer u aensicht niet van uwen gesalfden dienren ende gedenct die ontfermherticheden Davids, uwes knechts." Doe seide Salomon: "Ghebenedijt si God, die Heer, die sijn volc van Ysrahel rust gegeven heeft. Ende wat Hi tot Moyses geseit hevet, dat heeft Hi al gedaen. God die wes mit ons, als Hi mit onsen vaderen geweest heeft, ende en laet ons niet after, noch en verworpt ons niet ende keert onsen herten tot U, opdat wi in den wech moghen wanderen

[fol. 158rb]

ende houden u geboden ende die wet ende leven rechtvaerdelic, als onse voirvaders gedaen hebben. Here, hoert ons ghebet ende doet rechtvaerdicheit. Ende dan sel al dat volc der aerden weten dat Gi alleen God ende Here sijt, ende datter geen God en is dan Gi." Doe Salomon aldus sijn gebet vervolt hadde, doe quam daer een vuer van den hemel ende verbarnde dat offer dat opten outaer lach. Ende die mogentheit Gods die vervollede den tempel mit claerheit, sodatter geen priester in en dorste bliven, want al dat volc van Ysrahel die sagen dat vuer ende die glorie Gods opten tempel comen. Doe vielen si alle op haer knyen ende aenbeden Gode. Ende die priesteren ende die levyten die dancten ende loveden Gode.

Ende si songen dien psalm die David maecte om God daermede te dancken ende te loven van den doechden die God den kinderen van Ysrahel gedaen hadde. Ende desen psalm songen si tot alre tijt in den dienste Gods: "Confitemini Domino, quoniam bonus, quoniam in eternum misericordia eius. Beliet den Heer, want Hi guet is, want in ewicheit is sijn

[fol. 158va]

ontfermherticheit. Beliet God der Goden, want in ewicheit is sijn ontfermherticheit. Beliet den Here der Heren, die alleen doet wonderlike dinghen, die die hemelen gemaect hevet verstandelic, die vastgemaect hevet die aerde op die wateren, die grote lichten gemaect hevet: die sonne in moghentheit des dages, die mane ende die sterren in moghentheit des nachts, die Egipten sloech mit sijn eerstgeboren, die Ysrahel uutleide midden van hem in den moghender hant ende in den hoghen arm, die die Rode See deelde in delynghe ende uutleide Ysrahel midden voer hem ende versloech Pharo ende al sijn craften in die Rode Zee, die overleide sijn volc doer die woestijn, die die grote coninghen sloech. Ende Hi dode stercke coningen: Seon, den coninc van Amorreen, ende Og, den coninc van Basan, ende gaf dat lant te erve Ysrahel, sinen knecht, want in onser oetmoedicheit gedocht Hi onser ende verloste ons van onsen vianden. Die spijs gaf allen vleischs. Beliet God des hemels, beliet den Here des Heren, want in ewicheit is sijn ontfermherticheit."

Doe die priesteren ende die levyten Gode alsoe gedanct ende gelovet hadden, doe ghinc coninc Salomon voer ende offerde 2.000 ossen, ende 100 ende 20.000 scapen. Ende Salomon geboet seven dagen die hoech\tijt

[fol. 158vb]

te houden. Ende dat gemeen volc offerden doe wonderlike voel offerhande, omdat God den tempel geheilicht ende gewiet hadde. Ende want des volcs so voel ten tempel quam, so en mochten si binnen die seven dagen niet alle offeren. Ende doe verlenghede Salomon die hoechtijt noch seven dagen. Ende daer was grote hoechtijt in den tempel. Die priesters deden haren dienst, die sangers die songen. Men speelde op die organen ende mit alrehande geluyt. Soe dancten si ende loefden Gode. Ende doe die hoechtijt geeynt ende vervolt was dat daer geboden was, doe was dat volc verblijt van herten. Ende een ygelic die toech thuuswaert tot sijnre woenstede.