Noordnederlandse Historiebijbel

6 capittel

Salomon begonde den tempel Gods te maken in sijn vierde jaer dat hi coninc wort in die ander maent, als in die meye. Ende het was 400 jaer ende 92, nadat Moyses mit die kinder van Ysrahel uut Egipten ghinc. Ende dat fondament ende die mueren worden gemaect van marbarsteen.

Dien tempel was lanc 60 cubitus ende 20 cubitus wijt ende 30 cubitus hoech tot den nederste solre toe, ende 30 cubitus tot den anderen solre toe, ende 60 cubitus hoech tot den decsel toe. Den tempel was hoech 100 ende 20 cubitus. Ende die balcken ghinghen an alle siden buten der mueren vijf voeten lanc. Ende dat was binnen ende buten gesolret mit cederplancken. Ende buten waren die foeyen omme mit lenen gemaect, dat men daeromme ginc sonder vrese van vallen. Ende boven was den tempel gedecket, dat men daerop gaen mocht ende in die mueren waren veinsteren gemaect - binnen voel wier dan van buten - ende die mit sconen glasen versciert. Ende den inganc van den tempel die was int

[fol. 154rb]

oesteynde. Ende daervoer was een poertael, 20 cubitus lanc ende 10 cubitus wijt ende hoech totten nederste solre toe. Ende die trappen ende die wendelstenen waren gemaect, dat si in den tempel niet en hinderden noch en becommerden.

Ende daer was een witten marmarsteen wel gepareert. Als men den steen op dat werc brocht, so was hi te cort of te lanc, te dicke of te dinne, sodat dien steen van den wercluden verworpen wort ende niet geacht. Ten lesten doe men die twee mueren sluten soude, doe en vant men geen steen die daertoe diende. Doe namen die wercluden dien verworpen steen. Ende die quam daer te werc in den hoec ende sloet die 2 mueren tegader. Ende dat was een figuer van Jhesus: hoe dat Hi verworpen wort van den wercluden, als int ewangelium staet, geestelic te verstaen, eerst van den wercluden uut den wijngaert ende na van den wercluden uut den tempel. Ende die wercluden hieteden als Gods dienres. Ende dat waren priesteren ende lerers des volcs. Mer ten lesten doe Jhesus gedoot wort, doe wort den tempel der heiliger kercken volmaect ende die twee mueren in enen gesloten, als dat Oude Testament ende dat Nyewe. Ende dat wort

[fol. 154va]

een heilich kerc; dat is dat kersten gelove.

Oec was daer een cederboemhout an den tempel geordiniert te maken. Ende als men dat hout op dat werc brocht, so wast te cort, te lanc, te dicke of te dunne, sodat dat hout van den wercluden verworpen wort. Ende het wort geleit over een lopende water beneden an den berch daer den tempel op stont, omdattet volc daerover gaen soude. Ende doe die coninghinne van Saba daer quam om Salomons wijsheit te horen, doe soude si over dat water gaen, mer si ontsach haer dat hout mit haren voeten te betreden. Ende si ginc besiden dat hout doir dat water ende seide doe: "Felix ille Deus, qui ligno pendit ab alto. Salich is die God, die an dat hoge hout gehangen sel worden." Doe die woerden voer Salomon quamen, doe dede hi dat hout beneden den berch des tempels delven, 15 speet onder der aerden, omdattet verloren soude bliven ende tenietgaen. Ende menich jaer daerna doe wort beneden den berch des tempels een graft gedolven, daer men die beesten ende dat vleis in dwoech, dat men in den tempel offeren soude. Ende die graft was gedolven ter selver stede daer dat hout gedolven was. Doe Jhesus geboren

[fol. 154vb]

was ende predicte ende leerde den volc, doe plach die engel Gods somtijt te comen ende ruerde den gront van den water, sodat dat hout ten leste boven quam driven. Ende dat was die selve piscijn die int ewangelium staet daer die luden gesont worden, als die engel dat water beruert hadde. Ende doe Jhesus veroerdelt was te crucen, doe namen die joden dat hout uut der piscinen ende maecten daer dat cruce of. Ende dat was dat cederboemhout dat overeynde stont ende nu van den kerstenmenschen geeert wort, omdattet geheilicht wort van den lichaem ende van den bloede ons Heren Jhesu Cristi.

Doe die mueren ende solren des tempels gemaect waren, doe dede Salomon alle die mueren binnen onder den nedersten solre al bedecken mit cederplancken. Ende den inganc des tempels daer dede hi voir maken 4 paer doren ende die waren cyerlic gewrocht ende uutgesneden van wonderliken werc. Ende midden in den inganc daer stont een pylaerne die cyerlic gewrocht was, daer die doren an sloten. Die twee paer doren die ghinghen van buten op ende die ander twee paer doren die ghingen van binnen op. Ende als men die butenste doren opdede, so ghingen die binnentste doren mede op. Ende Salomon dede alle die wegen des tempels op die plancken ende die

[fol. 155ra]

nederste solre onder al mit gouden platen bedecken. Ende in die gouden platen waren geprent ende gewrocht gedaente van engelen, van palmen, van wonderliken dieren ende van verscierde blomen. Ende die nagelen, daer dat gout mede angenagelt was, die waren seer swaer ende die hoefden van den nagelen wonderlic versciert, sodat men in den tempel binnen an die wegen ende onder an den solre niet an en sach dan claer gout ende dat wonderlic versciert. Doe maecte Salomon een onderscot in den tempel ende dat van cederbomenhout. Ende dat wort al vergult ende versciert mit gouden platen. Ende dat was 10 cubitus hoech. Ende binnen dat onderscot dat hiet Sancta sanctorum. Ende dat was 20 cubitus lanc ende 20 cubitus wijt. Ende doe bleef dat ander van den tempel 40 cubitus lanc.

Ende an dat onderscot daer waren coperen pylaernen geset ende die vergult, ende die hoefden daerof wonderlic versciert. Ende an die pylaernen wort een gordijn gehangen van syden lakenen van vierderhande vorwen. Ende daer was wonderlike cyerheit in gewrocht: van engelen, van palmen, van wonderliken dieren, van lelyen ende van menigherhande blomen. Dat was die gordijn daer in den ewangelien of staet gescreven: doe Jhesus den

[fol. 155rb]

geest gaf, doe scoerde dat seyl of gordijn des tempels. Ende tot enen gehoechnisse so hanct men gemeenlic in der kercken in die vasten een cleet voir dat choer.

Doe dede Salomon an die suutzide van Sancta sanctorum een oraculum maken. Dat was een verscierde stede daer die overste biscop des tempels in bat. Ende an die noertzide van Sancta sanctorum so dede hi maken een tafel van cederbomenhout ende scragen ende al mit gulden platen ende een gulden croen daerom versciert. Ende op die tafel daer leide die overste priester dat broet op dat hi heilichde ende den wieroec ende ander specien die men in den dienste Gods besichde. Ende oec stonden daerop die gulden vaten die geheilicht waren, die men in Sancta sanctorum besichde.

Doe dede Salomon maken twee cherubinen van olijfbomenhout, 10 cubitus hoech, ende die stonden an elken side van Sancta sanctorum een. Ende an dat westeynde midden in Sancta sanctorum daer wort die arck Gods geset, die Moyses dede maken in der woestinen. Ende die een cherubin die stont tusschen die arck ende dat oratorium ende hadde twee vlogelen die elc vijf

[fol. 155va]

cubitus lanc was. Ende die een vlogel die reycte ende decte te half wegen over die arke. Ende die ander vlogel die reycte ende decte over dat oratorium. Ende die ander cherubin die stont an die noertside tusschen die arke ende die tafel ende hadde oec twee vlogelen. Den enen vlogel die ghinc over die arck an den anderen cherubins vlogel. Ende den anderen vlogel die ginc over die tafel. Ende die cherubinen waren beide wonderlic gemaect ende versciert ende bedect mit goude. Doe settede Salomon in Sancta sanctorum voer die arcke die gulden kandelaren die Moyses hadde doen maken in der woestinen, ende die gulden lantaernen ende lampen ende die wyeroecvaten ende ander gulden vaten daer men in den tempel mede diende.

Doe dede Salomon een poertael maken an den tempel voir hemselven, als hi ten tempel quam, daer hi in bat. Ende men ghinc uut den tempel in dat poertael. Ende daerof staet int ewangelium dat die joden Jhesum op een tijt ommebesingelden in Salomons poertael ende vraechden hem, hoe lange dat hi haer sielen quellen soude. Ende oec so dede Salomon een poertael maken voir den oversten priester. Ende daer ghinc men in uut Sancta

[fol. 155vb]

sanctorum. Ende oec so dede hi om den tempel voel poortalen maken, daer die gemeen priesteren in woenden, alst hoechtijt was ende si in den tempel dienden. Ende alle die poertalen die waren wonderlic versciert ende al vergult. Ende buten om den tempel hadde Salomon doen maken an die foeyen gulden wijngaertrancken ende gulden druven. Ende die wijngaertbladen waren al gulden. Ende tusschen die wijngaertbladen daer hingen glasen scellen, meerre ende minre. Ende als die wint die gulden bladen of die scellen ruerde, so gaven si een suet geluyt. Ende boven op den tempel dede Salomon setten vol gulden glavien boven scarp, sodat daer geen vogelen op sitten en souden die den tempel ontreynichden. Ende als men den tempel van verre sach, soe en wast niet anders an te sien dan oft een gulden wout geweest hadde. Ende dien tempel was volmaect in seven jaren.