Noordnederlandse Historiebijbel

9 capittel

Doe seide David: "Is daer yement gebleven van Sauls huys, opdat ic hem ontfermherticheit doen mocht om Jonathas mijns vrients willen?" Doe was daer een van Sauls gesin, die was sinen naem Syba. Die wort voir David gebrocht. Doe seide David tot Syba: "Is daer yement van Sauls geslacht gebleven?" Doe seide Syba: "Here coninc, daer is een kint gebleven van Jonathas, Sauls soen, mer dat is crepel, want doe Jonathas verslagen wort, doe nam die minne dat kint in haren arm ende weeck voir die vianden. Ende si liep ende viel mitten kinde. Ende dat kint viel die benen ontween. Ende daerof ist noch crepel." Doe seide David: "Waer is dat kint?" Doe seide Syba: "In Lodebar in Macirs huus."

Doe sende David om dat kint Myfiboseth. Ende doe Myfiboseth voer den coninc quam, doe viel hi voer hem op sine knyen ende bat genade. Doe seide David: "Myfiboseth, en weest niet vervaert. Ic sel u gracie doen om uwes vaders willen ende geven u al Sauls lant. Ende gi selt hier in mijn hof bliven

[fol. 135ra]

ende eten mijn broet ende gaen dagelics mit my ter tafel." Doe seide Myfyboseth: "Here coninc, ic danc u dat gi mi, arm, onmachtich mensche, gracy doet."

Doe seide David tot Syba: "Al dat lant ende husinc dat Sauls was, dat geve ic Myfyboseth. Ende bewaert gi dat mit uwen kinderen ende mit uwen knechten. Ende dient daerof Myfiboseth. Mer hi sel in mijn hof bliven." Syba die hadde 15 kinderen ende 20 knapen. Ende hi seide tot David: "Here coninc, als gi mi geboden hebt, dat sel ic doen." Ende Myfiboseth die hadde een jonc kint, dat hiet Mycha. Ende alle dat geslacht van Syba die dienden Myfiboseth. Ende Myfyboseth woende binnen Jherusalem ende at an des conincs tafel ende wort in des conincs hof gevoet.