Noordnederlandse Historiebijbel

31 capittel

Die Philisteen quamen te stride jegen die van Ysrahel. Ende die van Ysrahel weken ende worden verslegen. Ende Saul mit sinen kinderen die weeken op den berch van Gelboe. Ende die Philisteen die vervolchden hem mit scutters, sodat Sauls kinderen daer doot bleven: Jonathas, Abynadap ende Melchisue. Ende Saul was

[fol. 129ra]

seer gewont van den scutters, sodat hi niet ontgaen en mocht. Doe seide hi tot sinen sciltknecht: "Nem dijn swaert ende slach mi doot, opdat die onbesneden mannen mi niet doot en slaen ende mit mi niet en spotten." Ende die sciltknecht was vervaert ende en dorstet niet doen. Doe nam Saul sijn swaert ende viel dat hemselven doir sijn lijf. Ende also bleef hi doot. Doech die was Sauls sciltknecht. Ende hi hadde sinen soen bi hem. Ende doe Doech sach dat Saul doot was, doe nam hi sijn croen, sijn hecsel ende sijn ander cyerheit ende gafse sinen soen ende hiet hem dat hise David dregen soude, opdat hi daermede mocht versoenen. Ende doe ghinc die knecht mit die juweelen vandaen. Doe nam Doech van Amelech, die sciltknecht, sijn swaert ende vielt hemselven doer sijn lijf ende bleef also doot. Doe Saul mit sinen drien kinderen ende mit sinen sciltknecht doot waren ende dat die van Ysrahel vernamen, doe vlogen si ende weken voir die Filisteen. Ende die Filisteen verjaechdense ende verslogense.

Ende des anderen dages quamen die Filisteen op den berch van Gelboe. Ende si vonden daer Saul mit sinen 3 kinderen doot leggen. Doe

[fol. 129rb]

togen si hem dat harnas uut. Ende si slogen Saul sijn hoeft of. Ende si drogen dat harnas ende Sauls hoeft in Astraoths tempel ende hingen dat voir haren afgod. Ende die lichamen van Saul ende van sinen kinderen die namen si ende hingense buyten der mueren van der steden Bethsan. Doe dat die kinder van Ysrahel vernamen die in Jabes woenden, wat die Filisteen Sauls lichaem gedaen hadden, doe vergaderden si alle die stercste mannen van Jabes ende togen bi nacht tot Bethsan ende namen die lichamen van der mueren ende brochtense tot in Galaad. Ende si gruevense daer ende si bescreiden die lichamen seven dagen lanc.

Saul wort beroeft van sijn lijf ende van sijn conincrijc, omdat hi van God sciet ende geloefde die waersagers. Also worden si beroeft van die vroechde des ewigen leuens die nu geloven in waersagers, in segenen ende diesgelijc. Dat hevet die heilige Kerc al verboden. Saul diende in sijn beghin Gode, mer na doe diende hi den duvel. Ende hi was coninc over die kinder van Ys\rahel

[fol. 129va]

20 jaer lanc.

Explicit Samuel, Liber Regum primus.

Hoc opus exegi, Cristo sit gloria Regi.

Et sic est finis, sit laus et gloria Trinis.

Qui legit, emendat; scriptorem non reprehendat.

Scriptor scripsisset bene melius, si potuisset.

Qui scripsit scripta, sua dextera sit benedicta.

Syclus genus est ponderis; est nomen Hebreum habens pondus uncie apud eos. Apud Latinos autem et Grecos quarta pars; uncie est stateris mediatas dragmas appendens duas.

Hieran volcht dat Ander boec der Coninghen.

[fol. 130ra]