Noordnederlandse Historiebijbel
(1998)–Anoniem Noordnederlandse Historiebijbel–
Auteursrechtelijk beschermd
[Folio 128ra]
| |
van Ysrahel lagen op een fonteyne. Ende David was in die achterste scaer van den Filisteen mit sinen volc. Doe seiden die Filisteen tot den coninc Achis: "Wat sellen dese Hebreeusche mannen onder ons doen?" Doe seide Achis tot den prinsen der Philisteen: "Het is David, die Sauls knechte was ende heeft lange onder my gewoent. Ende ic en hebbe nye enich archeit an hem vernomen." Doe waren die princen toornich op Achis ende seiden: "Laet die man weder thuus keren in sijn stede daer gi hem geset hebt. Ende en laet ons niet mit hem te stride gaen. Ende en laet hem in onsen raet niet wesen, want isset niet dieselve David daer die vrouwen of songen: Saul versloech 1.000 man ende David 10.000?" Doe riep die coninc Achis David tot hem ende seide: "Leeft die Heer, so weet ic dat gi gerechtich ende guet sijt. Ende ic en hebbe nye quaet an u gevonden seer dat gi bi my quaemt. Mer ten genoecht den princen van onsen volc niet dat gi onder hem sijt. Daerom so trect in vreden in u stede." Doe toech David mit sinen volc in der nachten tot sijnre steden waert. |
|