hemselven: "Oft mi geboerde dat ic op een tijt onder Sauls handen quaem, est mi dan niet beter dat ic wijcke onder die Filisteen, opdat Saul mi niet en vernimt ende niet meer en vervolcht? Ic wil uut sinen handen wiken." Doe ghinc David mit 600 mannen ende sijn gesin tot Achis, den coninc van Geth, ende woende daer een tijt ende hadde daer bi hem twee wiven, als Achinoem ende Abygayl. Ende het wort Saul geboetscapt dat David int lant van Geth was, mer Saul en vervolchde hem niet meer. Doe ghinc David tot Achis, den coninc, ende seide: "Here coninc, hebbe ic vrientscap voir u vercregen, so bid ic u dat gi mi een stede geeft daer ic mit minen volc in mach wonen." Doe gaf Achis, den coninc, David een stede, hiet Syceleg. Daerom hietede Syceleg die stede van Juda.
Doe toech David vechten ende roven onder die Filisteen van Gesury ende Getry ende van Amelech ende in Sur al tot Egypten toe. Ende waer hi quam, hi versloecht al, mannen ende wiven, omdat si niet en souden comen clagen voir den coninc Achis over David. Ende David nam hem scapen, ossen, ezelen, camelen, clederen ende ander scierheit. Ende als David dat guet brocht, so vraechde Achis David waer hi dat guet geroeft had. So andwoerde David ende seide: "Op die van Juda, van Jeramel ende van Ceny." Ende Achis die geloefde hem dat, omdatter geen clage voir
Auteursrechtelijk beschermd