Noordnederlandse Historiebijbel

24 capittel

Doe toech David vandaen wonende in Engady in der woestinen ende verberch hem in die steenroedsen. Ende doe Saul wederkeerde van den Filisteen, doe wort hem geseit dat David was in der woestinen van Engady. Doe vercoes Saul 3.000 stercker mannen uut Ysrahel om David mit den sinen te vervolgen in der woestinen van Engadi. Ende Saul ghinc heymelic in die spelunc om sijn gevoech te doen. Ende David mit somme van sijn gesinne was in der spelun\ken.

[fol. 124vb]

Doe seiden die knechten tot David: "Siet, nu is die tijt gecomen dat gi mit uwen viant moecht doen wat gi wilt." Doe stont David op, mer hi bedocht hem ende sloech voir sijn herte ende bat Gode dat Hi hem bescermen most dat hi sijn hant niet en sloech an den gesalfden coninc. Ende hi scicte sijn volc te vreden.

Doe maecte David desen psalm: Exaudi, Domine, justiciam meam; intende deprecacionem meam. Here, verhoert mijn gerechticheit ende verstaet mijn gebet. Ende dien psalm voirt uut.

Ende doe trat David heymelic an ende sneet een stuc uut Sauls mantel. Doe ghinc Saul uter speluncke. Doe volchde hem David na ende riep hem na ende seide: "O, here coninc, mijn here!" Doe sach Saul omme. Doe viel David op sine knyen ende bat ende seide: "Heer coninc, waerom hoer gi die woerden dergeenre die mi voir u vermaken ende seggen quaet van mi? Siet, huden so gaf God u in minen handen in der spelunken ende ic docht u te doden, mer ic spaerde u ende seide: `Ic en wil mijn hant an minen heer, den gesalfden, niet steken ende ic en wil hem niet misdoen.' Ende tot enen getuuch so siet hier een stuc van uwen mantel. Daerom, bedenct u ende bekent dat in mi geen quaet en is noch boesheit. God oerdel dat tusscen u ende mi, want ic en begeer

[fol. 125ra]

u niet te misdoen, al vervolgi mi. Mer ic bidde God dat Hi my bescerme voir uwen handen."

Doe Saul die woerden hoerde, doe seide hi: "Sie gi dat, David, mijn kint?" Ende doe Saul hem sach, doe screyde hi. Ende hi seide tot David: "Gi sijt rechtvaerdiger dan ic, want gi doet mi guet ende ic doe u quaet. Want ic kenne dat gi huden guet gedaen hebt, want God hadde mi gegeven in uwen handen ende gi en wout mi niet doden. God verleen u daervoer lange leven. Ende ic kenne dat gi coninc selt wesen in Ysrahel. Daerom, sweert mi dat gi mijn geslacht ende mijn huys niet en selt tenietmaken. Ende David die swoer hem dat. Ende doe toech Saul thuuswaert.

Ende doe maecte David dien psalm: Miserere mei, Deus, miserere mei, quoniam in te confidit anima mea. Ontfermt mijns, Here God, ontfermt mijns, want in U betrouwet mijn ziel. Ende dien psalm uut.