Noordnederlandse Historiebijbel

6 capittel

Daerna doe sondichden die kinderen van Ysrahel jegen God. Ende doe lietse God plagen, quellen ende verslaen van die van Madyan ende van Amelech. Seven jaer lanc waren si bedruct, want alle jaer so verbarnden si haer coren ende namen haer beesten ende vingen ende slogen haer volc.

Doe die kinder van Ysrahel also bedruct waren, doe riepen si om hulp an God. Ende doe sende hem God een propheet. Die sprac hem toe ende seide: "Dit seit God van Ysrahel: Ic hebbe u gebrocht uut Egipten ende verlost van uwen vianden die u vervolchden. Ende Ic heb u vianden uut dit lant verdreven ende seide u: Ic ben u Heer, u God. Ic seide u: dient noch anbeet die afgoden niet die die heydenen anbeden. Ende gi en wilt mijn woerden niet horen." Doe screyden die kinder van Ysrahel ende baden om genade ende om hulpe an God.

Doe was daer een rijc man, hiet Joyas, ende hadde een soen, hiet Gedeon, die was in den acker ende vergaderde dat coren om thuys te dragen, om\dattet

[fol. 94va]

die Madyaniten niet en souden verbarnen. Doe openbaerde hem die engel Gods ende seide: "Die Here van Ysrahel die si mit u." Doe seide Gedeon: "Here, ic bid U: seg mi: is die Here mit ons, waerom gesciet ons al dit quaet? Waer sijn nu sijn wonderlike wercken die onse vaderen ons vertelt hebben: hoe datse God uut Egipten lede? Mer nu heeft God ons gelaten ende heeft ons gegeven onder die Madyaniten." Doe seide die engel tot Gedeon: "Gaet, in uwer stercheit sel gi die kinder van Ysrahel verlossen van die van Madyan." Doe seide Gedeon: "Here, ic bidde U: segt mi: waermede soude ic Ysrahel verlossen? Siet, mijn geslacht is beneden in Manasse ende ic ben die mintste in mijns vaders huys." Doe seide die engel tot hem: "God sel mit u wesen ende verslaen die Madianiten als een man." Doe seide Gedeon: "Heb ic graci voer God gevonden, so gevet mi een teyken dat ic weet dat gi van God coemt. Ende en sceit niet van hier, eerdat ic wedercoem ende brenge Gode hier sacrifici dat ic u offeren mach." Doe seide die engel: "Ic sel uwes alhier ontbeiden." Doe ghinc Gedeon int huys ende koecte een geyt ende maecte licht broet van blomen. Ende hi dede die spijs in een korf ende water in een pot ende sette

[fol. 94vb]

dat onder een akerboem. Doe seide die engel: "Neemt dat vleis ende dat broet ende lectet op dien steen ende stort dat water daerop." Gedeon dede dat. Doe stac die engel die roede uut die hi in die hant hadde ende raecte dat vleis ende dat broet. Ende doe quam daer vuer uut den steen ende verbarnde dat vleis ende dat broet. Ende doe was die engel van hem. Doe Gedeon sach dattet die engel Gods was die mit hem gesproken hadde, doe seide hi: "Wee mi, Here God, ic heb den engel gesien: aenschijn jegen aenschijn. Nu sel ic sterven." Doe sprac die stemme Gods tot hem ende seide: "Vrede si mit u. En ontsiet u niet. Gi en selt noch niet sterven." Doe maecte Gedeon daer een outaer in die ere Gods ende dat outaer wort genoemt die Vrede Gods.

Doe Gedeon daer noch was in Ephra, doe sprac God tot hem in der nacht ende seide: "Neemt uwes vaders stier ende een ander stier van 7 jaren. Ende breect dat outaer van Baal dat in uwes vaders huys is. Ende maect God een outaer op den steen daer gi eerst die sacrificie op settede. Ende neem den anderen stier ende offerten Gode tot enen sacrifici. Ende snijt hout uut den bussche ende barntet daermede." Doe nam Gedeon 10 van sinen knechten ende dede al dat hem God bevolen hadde. Mer hi ontsach sijns vaders huysgesin ende dat volc van der steden ende en woude dat bi

[fol. 95ra]

dage niet doen, mer des nachts volbrocht hijt. Ende des uchtens doe sach dat volc van der steden dat Baals outaer gebroken was ende die stede verbarnt was ende een ander stier geset op dat outaer dat na gemaect was. Doe seiden si jegen malcander: "Wie heeft dat gedaen?" Si vraechden also lange, dattet hem geseit wort dattet Gedeon gedaen hadde, Yoyas soen. Doe ghinc dat gemeen volc tot Joyas ende seide: "Geeft ons uwen soen ende laten ons doden, want hi heeft Baals outaer gebroken ende verbarnt." Doe seide Joyas: "Sie gi wrekers van Baal ende sijn voervechters? Es Baal God, hi wreec hemselven over diegene die sijn outaer gebroken heeft."

Ende doe wort Gedeon genoemt Yeroboal.

Doe vergaderden die van Madian ende van Amelech ende van dat oesteynde des lants al op der Jordanen. Ende God sende in Gedeon enen gueden geest. Ende hi blies mit enen basune ende dat huusgesin van Abyeser dat volchde hem. Ende Gedeon sende boden tot die van Manasses ende die volchden hem. Ende hi sende ander boden tot die van Azer ende van Sabulon ende van Neptalim. Ende si quamen al tot hem.

Doe seide Gedeon tot Gode: "Est dattet also is, Here God, dat Gi die van Ysrahel bi mi selt verlossen als Gi geseit hebt, so duet an desen vleis een teyken ende laet op dien vleis ende op dien wolle douwen ende laet die aerde

[fol. 95rb]

daeromme droech bliven." Ende het gesciede also: het douwede op den vleis ende dat lant bleef droech. Doe seide Gedeon noch tot Gode: "Here, en vertoornt U op my niet, dat ic noch eens een teyken an U soke. Ic bidde U: latet op die aerde douwen ende laet den vleis droech bliven." Ende God dede des nachts als Gedeon begheerde: dat vel bleef droech ende die aerde bedouwede.