Noordnederlandse Historiebijbel

4 capittel

Daerna doe misdeden die kinder van Ysrahel jegens God. Ende God gafse onder die handen den coninc van Canaan, genoemt Jabin. Ende hi hadde een hertoge die sijn maerscalc was ende was genoemt Sysara. Doe Jabin die kinder van Ysrahel 20 jaer in dwanc gehadt hadde, doe riepen si om hulpe ende om troest an God.

Doe was daer een prophetisse, genoemt Delbora. Die seide tot enen man, hiet Barach, ende was van Neptalims geslacht: "God ontbiet u dat gi selt nemen 10.000 stercker mannen van Neptalims geslacht ende gaen an den berch Thabor. Daer sel u God Sysara, Jabins maerscalc, al sijn volc ende al sijn wagenen in u handen geven, want Sysara hadde mit hem 300.000 man ende 900 snydende wagenen." Doe seide Barach tot Delbora: "Ist dat gi mit my reyst, soe reyse ic daer. Ende en wil gi daer niet mede, so en wil ic daer niet." Doe seide Delbora: "Ic sel mit u reysen. Mer gi selt weten dat u die victorie niet toe

[fol. 93vb]

en sel worden gegeven, want in den handen eens wijfs sel God Sysera geven." Doe toech Delbora ende Barach tesamen in Cedes.

Ende si hadden mit hem 10.000 vechters van Neptalim ende van Sabulon.

Ende daer woende een man, hiet Yaber, bi Cedes ende was Moyses neve. Ende sijn wijf, Yahel, die hadde vrientscap mit Yabin ende mit Sysera.

Ende doe wortet Sysera geboetscapt dat Barach was opten berch van Thabor ende woude jegen hem striden. Doe scicte Sysera die 900 snydende wagenen ter weer mit al sijn volc. Doe seide Delbora tot Barach: "Staet op ende bereit u. Dit is die dach dat God Sisera sel geven in uwen handen." Doe ghinc Barach van den berch ende die 10.000 vechters mit hem. Ende God vervaerde Sysera ende al sijn volc, want van den hemel quam wint, regen, hagel, blixem ende donre, sodat nyement van den wagenen en mocht scieten noch slingeren. Ende dat viel van den wagenen ende van den paerden. Ende dat volc wort verslegen ende van den paerden vertreden. Ende Sysera die liep te voet wech ende quam tot Jabers huys lopen. Doe ghinc Jahel, Jabers wijf, hem jegen ende seide: "Here, coemt in mijn huys ende en weest niet vervaert." Doe ghinc Sysera int huys ende Jahel die leyde hem in een camer ende decte hem

[fol. 94ra]

mit enen mantel. Doe seide Sysera: "Ic bid u: geeft mi eens water drinken, want ic hebbe groten dorst." Ende doe nam Jahel een vat mit melc ende gaf hem drinken. Ende si decte hem weder. Doe seide Sysera tot Jahel: "Staet voer die doer. Ende comt hier yement ende vraecht of hier yement in is, so segt: hier en is nyement in." Ende Sysera die wort ontslaep. Ende Yahel nam enen langen nagel ende enen hamer ende ghinc al heymelic tot Sysera ende settede den nagel op sijn hoeft ende sloech mitten hamer den nagel doer sijn breyn ende nagelde sijn hoeft jegen die aerde. Ende hi bleef doot. Ende Barach die vervolchde Sysara. Ende Jahel ginc hem jeghen ende seide: "Coemt, ic sel u den man tonen die gi soect." Ende doe Barach int huys quam, doe sach hi Sysera daer doot leggen, genagelt jegen die aerde. Ende doe dancte hi Gode ende ghinc tot Delbora die opten berch Thabor stont ende bat.