Noordnederlandse Historiebijbel

11 capittel

Doe Jabin, die coninc van Azor, verhoerde die grote mogentheit van Josue, doe ontboet hi den coninc van Madon, ende den coninc van Semeron ende den coninc van Acsaph, ende oec alle die coninghen die daer woenden in dat westeinde van dat gebercht ende oec in dat effen lant. Ende oec ontboet hi dat conincrijc van Dor bi der see, ende die van Cananeen van oesten ende van westen, van Etheen, Amorreen, Phereseen, Yebuseen, ende alle die daer int lant woenden, sodat si een scaer van volc vergadert hadden die ontallic was, gelijc dat dat sant bi der zee ontallic is. Ende si hadden grote scaren van paerden ende van wagenen. Alle die coningen mit al haren volc die quamen op dat water van Meron om jegen die kinder van Ysrahel te vechten.

Doe seide God tot Josue: "En ontsiet u niet! Morgen sel Ic u al dit volc ghewont geven in uwen handen. Haer paerden sel gi verslaen; haer wagenen sel gi verbarnen." Doe ginc Josue mit al sijn volc tegen sijn vianden. Ende si slogen in hem. Ende God gafse hem in haren handen. Ende si verslogense ende vervolchdense tot dat Grote Sydonen. Ende si verslogent al ende en lieten nyement levende. Si verderfden die paerden; die wagenen verbarndense, ende deden

[fol. 87ra]

als hem God bevolen hadde.

Doe quam Josue mit al sijn volc voer die stat Azor. Ende dat was die overste stat van al dien lande. Josue wanse ende versloecht al dat daerin was ende verbarnden die stede Azor. Ende oec wan hi al die steden daeromtrent ende sloecht al doot. Ende doe deelden die kinder van Ysrahel den roef, als hem Moyses bevolen hadde. Ende Josue volbrocht al dat hem God bevolen hadde.

Ende Josue toech doer al dat lant ende vacht lange jegen dat volc. Ende daer en was geen stede die hem opgaf sonder vechten, dan Eveon die lach bi Gabaon. Doe quam Josue int gebercht ende versloech dat geslacht van Enachim - dat waren ruesen - ende verderfde al die steden sonder Gasa ende Geth ende Ozotha. Ende doe wijsde Josue elc geslacht in een lant ende si rusteden van striden.